رووداو دیجیتاڵ
وەزارەتی نەوتی عێراق دەڵێ، ئەو گۆڕانکارییەی لە نرخی بەرهەمە نەوتییەکاندا کراوە تەنیا بۆ دامودەزگا حکومییەکان و کەرتی دیکەیە و هاووڵاتییان ناگرێتەوە.
وەزارەتی نەوتی عێراق، رۆژی هەینی، 11ی ئەیلوولی 2026، لە روونکردنەوەیەکدا بۆ رای گشتی گوتی: "ئەوەی بەم دواییە لە هەندێک پلاتفۆرمی سۆشیاڵ میدیا سەبارەت بە نرخی بەرهەمە نەوتییەکان بڵاوکراوەتەوە، پەیوەندی بەو نرخەوەیە کە بۆ لایەن و فەرمانگە حکومییەکان و کەرتەکانی دیکە پەسندکراوە و ئەو بەرهەمە نەوتییانە ناگرێتەوە کە بۆ هاووڵاتییان دابین دەکرێ."
لە روونکردنەوەکەدا هاتووە، نرخی ئەو بەرهەمە نەوتیانەی بۆ هاووڵاتییان تەرخان کراوە، هیچ گۆڕانکارییەکی بەسەردا نەهاتووە و هێشتا بەو نرخە پاڵپشتیکراوانە دەفرۆشرێن کە لای هەمووان زانراوە.
وەزارەتی نەوتی عێراق داوا لە هاووڵاتییان و میدیاکان دەکات، پشت بەو زانیارییانە ببەستن کە لەلایەن سەرچاوە فەرمییەکانەوە بڵاودەکرێنەوە و "بەدوای ئەو هەواڵ و بڵاوکراوە نادروستانەدا نەچن کە لەوانەیە ببنەهۆی سەرلێشێواندن یان نیگەرانی."
حکومەتی عێراق ساڵانە بڕێکی زۆر پارە بۆ پاڵپشتیکردنی نرخی سووتەمەنی (بەنزین، نەوتی سپی و گازوایل) تەرخان دەکات تاوەکو بە نرخێکی کەمتر لە تێچووی راستەقینەی خۆی بگاتە دەست هاووڵاتییان.
نرخی بەنزینی پاڵپشتیکراو بۆ هەر لیترێک:
نۆرمال : 450 دینار
موحەسەن : 850 دینار
سوپەر: 1250 دینار
نەوتی سپی بۆ هاووڵاتییان: 150 دینار بۆ هەر لیترێک
زەیتی گاز(دیزل) بۆ هاووڵاتییان : 400 دینار بۆ هەر لیترێک
