رووداو دیجیتاڵ
هەواڵگریی سەربازیی عێراق راگەیاند، هێزەکانیان سەرکردەیەکی دیاری داعشیان لە کەرکووک دەستگیرکردووە. کە بەپێی ماددەی 4/1ی یاسای بەرەنگاربوونەوەی تیرۆر داواکراوبوو و یەکێک بوو لە ئامانجە زۆر گرنگەکانی دەزگە ئەمنییەکان.
عەقید حەیدەر محەممەداوی، بەڕێوەبەری راگەیاندن و پەیوەندییەکانی هەواڵگریی سەربازی لە وەزارەتی بەرگریی عێراق، ئەمڕۆ یەکشەممە، 13ی ئەیلوولی 2026، بە تۆڕی میدیایی رووداوی راگەیاند: "هێزەکانمان یەکێک لە داواکراوە تیرۆریستییەکانیان بەناوی (ئەبو ساهر) دەستگیرکرد، کە بەپێی ماددەی 4/1ی یاسای بەرەنگاربوونەوەی تیرۆر داواکراوبوو و یەکێک بوو لە ئامانجە زۆر گرنگەکانی دەزگە ئەمنییەکان."
دەستگیرکردنی ئەو سەرکردەیەی داعش دوای بەدواداچوونێکی وردی هەواڵگری هات، کە شوێنی خۆحەشاردانەکەی لە ناحیەی یایچی لە پارێزگای کەرکووک دیاریکرا. ئۆپەراسیۆنەکەش بە هاوئاهەنگیی نێوان بەشی هەواڵگریی فیرقەی 8 و هۆبەی هەواڵگریی یایچی کرا.
بەگوتەی عەقید حەیدەر محەممەداوی، ئەو دەستگیرکراوە چەندین پۆستی لەنێو "ویلایەتی عێراق"دا هەبووە؛ لەوانە لە "فیرقەی یەرمووک" لە پارێزگای ئەنبار لە سنووری سەقڵاوییە کاری کردووە، هەروەها لەکاتی دەسەڵاتی رێکخراوی داعش لە هەندێک ناوچەی ئەنبار، پۆستی لە "دیوانی خزمەتگوزارییەکان"دا وەرگرتووە.
هەواڵگریی سەربازیی عێراق دەڵێت، رێکاری یاسایی پێویست بەرامبەر تۆمەتبارەکە گیراوەتەبەر بۆ ئەوەی بەپێی یاسا کارپێکراوەکان رەوانەی دادگە بکرێت.
