رووداو دیجیتاڵ
دادگەی باڵای فیدراڵیی عێراق سکاڵایەک لەبارەی ئەنجوومەنی باڵای دادوەریی هەرێمی کوردستان رەتدەکاتەوە و پارێزەرى سکاڵاکارەکەش دەڵێت:" پەنا بۆ دادگەی کارگێڕی دەبەین".
دووشەممە 14ی ئەیلولی 2026، دادگەی باڵای فیدراڵیی عێراق یەکەم دانیشتنی لەبارەی ئەو سکاڵایەوە کرد، کە لە دژی درێژکردنەوەی ماوەی عەبدولجەبار عەزیز، وەک سەرۆکی ئەنجوومەنی باڵای دادوەریی هەرێمی کوردستان بوو.
دادگەی باڵای فیدراڵی بڕیاری رەتکردنەوەی ئەو سکاڵایەی دا بە پاساوى ئەوەی لە تایبەتمەندیی دادگەکەدا نییە.
نیاز محەممەد، پارێزەری دۆسیەکە بە تۆڕی میدیایی رووداوی راگەیاند: لە دوای ئەوەی بەفەرمی بڕیارەکەی دادگەیان پێ دەگات، لە دادگەی کارگێڕیی عێراق لەسەر هەمان پرس سکاڵا تۆمار دەکەن".
سکاڵاکە لە دژی سەرۆکی ئەنجوومەنی باڵای دادوەریی هەرێمی کوردستان و جێگرەکەی بوو، لەو سکاڵایەدا داواکرابوو بوو دادگەی باڵای فیدراڵی بڕیارێکی یەکلاکەرەوە دەربکات بۆ ئەوەی کاری سەرۆکی ئەنجوومەنەکە رابگیرێت.
