رووداو دیجیتاڵ
راوێژکاری وەزیری بازرگانیی عێراق دەڵێ، لە رێگەی تیمەکانیانەوە چاودێریی بازاڕ دەکەن بە مەبەستی رێگریکردن لە بەرزبوونەوەی نرخ.
محەممەد حەنوون، راوێژکاری وەزیری بازرگانیی عێراق، رۆژی شەممە (19ـی ئەیلوولی 2026) بە رووداوی راگەیاند: "بەرزبوونەوەی نرخی هەندێک کاڵا لە بازاڕەکاندا پەیوەندی بە چەند هۆکارێکی دەرەکی و نێوخۆییەوەیە، لەوانەگۆڕانی نرخ لە بازاڕەکانی جیهان، زیادبوونی تێچووی گواستنەوە و بارکردن، گۆڕانکاری لە نرخی ئاڵوگۆڕی دراو، بڕی خستنەڕوو و خواست".
راوێژکاری وەزیری بازرگانیی عێراق گوتی: "ئەم هۆکارانە نابنە پاساو بۆ قۆڕخکاری یان هەڵخەڵەتاندنی هاووڵاتییان لەلایەن هەندێک بازرگانەوە"؛گوتیشی: "رێکاری یاسایی تووند بەرامبەر سەرپێچیکاران دەگرینەبەر".
محەممەد حەنوون دەڵێت: "رۆڵی وەزارەتی بازرگانی تەنیا لە چاودێری نرخدا کورت نابێتەوە، بەڵکو چاودێری جۆر و کواڵیتی کاڵاکان دەکەن و رێگری لە هەر ساختەکارییەکی بازرگانی و یاریکردن بە نرخەوە دەکەن".
وەزارەتی بازرگانیی عێراق داوای لە هاووڵاتییان کرد، لەگەڵ تیمە چاودێرییەکان هاوئاهەنگ بن و هەر گرانفرۆشی یان قۆرخکارییان بینی، رایبگەیێنن.
رۆژی هەینی (18ـی ئەیلوولی2026)، موقتەدا سەدر، رێبەری رەوتی نیشتمانیی شیعە، لە گوتاری نوێژی هەینیدا کە لە عێراق خوێندرایەوە، داوای لە بازرگانان کرد پابەندی رەوشتی بازرگانی بن و دووربکەونەوە لە گرانفرۆشی، فێڵکردن، ساختەکاری و سوودخۆری.
سەدر هۆشداری دا کە ئەگەر حکومەت چاوپۆشی لە سەرپێچییەکان بکات، ئەوان بێدەنگ نابن و چاودێری رەفتارەکانیان دەکەن.
