رووداو دیجیتاڵ
بەڕێوەبەری راگەیاندن و پەیوەندییەکانی بەڕێوەبەرایەتی گشتیی کاروباری مادەی هۆشبەری عێراق، ئەمڕۆ یەکشەممە 20ی ئەیلوولی 2026، بە تۆڕی میدیایی رووداوی راگەیاند، بە هەوڵێکی هەواڵگریی نێودەوڵەتی، هێزەکانی نەهێشتنی مادەی هۆشبەر لە ئەنبار، بە هاوئاهەنگی لەگەڵ بەڕێوەبەرایەتیی گشتیی نەهێشتنی مادەی هۆشبەر لە کوێت، ئۆپەراسیۆنێکیان لەنێو خاکی ئەو وڵاتەدا کرد و لە ئەنجامدا هەوڵێک بۆ بەقاچاخبردنی 700 هەزار حەبی هۆشبەری جۆری (کاپتاگۆن) پوچەڵکرایەوە و دوو تۆمەتبار دەستگیرکران، کە یەکێکیان هاووڵاتیی عێراقە و ئەوی دیکەیان بە نایاسایی لە کوێت نیشتەجێ بووە.
عەباس بەهادلی، بەڕێوەبەرایەتیی گشتیی کاروباری مادەی هۆشبەر لە عێراق رایگەیاند، هەوڵەکانیان بۆ وشککردنی سەرچاوەی دارایی ئەو تۆڕانە و رێگریکردن لە گەیشتنی مادەی هۆشبەر بە کۆمەڵگەکان بەردەوامە و بۆ ئەم مەبەستەش، هاوئاهەنگی لەگەڵ وڵاتانی دیکە فراوانتر دەکەن.
عەباس بەهادلی، باسی لەوەکرد، بەڕێوەبەرایەتیی کاروباری مادەی هۆشبەری نەینەوا، بە هاوئاهەنگی لەگەڵ هاوتاکەیان لە سەلاحەدین، دوو تۆمەتباری دیکەیان دەستگیرکرد و دەستیان بەسەر 13,500 حەبی هۆشبەردا گرت.
بەپێی ئاماری بەڕێوەبەرایەتیی گشتیی کاروباری مادە هۆشبەرەکان و کارتێکەرە دەروونییەکانی عێراق، ئەم ساڵ دەستیان بەسەر 2 تۆن و 370 کیلۆگرام مادەی هۆشبەردا داگرتوە و 4 هەزار و 644 کەس بە تۆمەتی بازرگانیکردن و بەکارهێنانی مادەی هۆشبەر سزادراون، کە 69 کەسیان سزای لەسێدارەدانیان بۆ دەرچووە و 267 کەسیش سزای زیندانیی تاهەتاییان بۆ دەرکراوە.
بەگوێرەی ئامارە فەرمییەکە، لە ساڵی 2026دا 304 تۆڕی نێوخۆیی و 54 تۆڕی نێودەوڵەتی هەڵوەشێندراونەتەوە؛ هەروەها 21 ئۆپەراسیۆن لە دەرەوە کراون و 43 فەرمانی دەستگیرکردنی نێودەوڵەتی دەرکراون.
بەڕێوەبەری راگەیاندنی بەڕێوەبەرایەتییەکە دەڵێ، لەکاتی ئۆپەراسیۆنەکاندا 32 جار رووبەڕووبوونەوەی چەکداری لەنێوان هێزەکانیان و بازرگانانی مادەی هۆشبەر روویداوە. لە ئەنجامدا کارمەندێکی هێزە ئەمنییەکان کوژراوە و 31ـی دیکە بریندار بوون؛ هەروەها 3 بازرگانی مادەی هۆشبەر کوژراون و 23ـی دیکەش بریندار بوون.
