رووداو دیجیتاڵ
فڕۆکەخانەی نێودەوڵەتیی نەجەف دەڵێ، تاوەکو ئێستا هیچ ئاگادارکردنەوەیەکیان لەبارەی راگرتنی گەشتەکان لەگەڵ کۆماری ئیسلامی ئێران بەدەست نەگەیشتووە.
عامر توفەیلی، بەڕێوەبەری راگەیاندنی فڕۆکەخانەی نێودەوڵەتیی نەجەف، ئێوارەی ئەمڕۆ سێشەممە 22ی ئەیلوولی 2026 بە تۆڕی میدیایی رووداوی راگەیاند: "تاوەکو ئێستا بە فەرمی هیچ ئاگادارکردنەوەکمان بەدەست نەگەیشتووە لەبارەی راگرتنی گەشتی ئاسمانیی نێوان عێراق و کۆماری ئیسلامی ئێران. ئەوەی لەو بارەیەوە باس دەکرێ تەنیا قسەی میدیاکانە و تاوەکو ئێستا هیچ بڕیارێکی فەرمیمان بەدەست نەگەیشتووە".
فڕۆکەخانەی نێودەوڵەتیی نەجەف زۆرترین گەشتی لەگەڵ ئێران هەیە، بەهۆی سەردانیکردنی شوێنە پیرۆزەکانی پەیڕەوانی شیعە مەزهەب لە نەجەف و کەربەلا.
ئەم رەتکردنەوەیە لە کاتێکدایە، لە تۆڕە کۆمەڵایەتییەکان بەو جۆرە بڵاوکراوەتەوە کە حکومەتی عێراق بڕیاری داوە هەموو گەشتە ئاسمانییەکانی نێوان عێراق و ئێران لەمشەوە رابگرێ و هۆکارەکەیشی بۆ سزاکانی ئەمریکا بۆسەر ئێران گەڕێندراوەتەوە.
هاوکات، رێکخراوی فڕۆکەوانیی ئێران لە راگەیێندراوێکدا بڵاویکردەوە، تاوەکو ئێستا لەلایەن عێراقەوە هیچ ئاگادارکردنەوەیەکیان بەدەست نەگەیشتووە و ئەو دەنگۆیانە رەت دەکەنەوە.
فڕۆکەخانەکانی عێراق و هەرێمی کوردستان بریتین لە بەغدا، بەسرە، نەجەف، موسڵ، کەرکووک، هەولێر و جەلال تاڵەبانی لە سلێمانی.
