رووداو دیجیتاڵ
گەشتی ئاسمانیی فڕۆکەخانەی نێودەوڵەتیی نەجەف لەگەڵ ئێران بەردەوامە، بەرپرسێکی فڕۆکەخانەکە دەڵێت، هیچ گەشتێکیان هەڵنەوەشاوەتەوە و ئەمڕۆ 15 گەشتیان لەگەڵ ئێراندا هەیە.
عەمار توفەیلی، بەڕێوەبەری راگەیاندنی فڕۆکەخانەی نێودەوڵەتیی نەجەف، ئەمڕۆ پێنجشەممە 24ی ئەیلوولی 2026 بە تۆڕی میدیایی رووداوی راگەیاند، گەشتی ئاسمانیی نێوان فڕۆکەخانەی نێودەوڵەتی نەجەف و ئێران بەردەوامە، تاوەکو ئێستا هیچ بڕیارێکیان لەبارەی راگرتنیان بەدەست نەگەیشتووە و کاروبارەکان بە شێوەیەکی ئاسایی بەڕێوەدەچن.
ئەو بەرپرسە گوتی:" تاوەکو ئێستا هیچ گەشتێکمان هەڵنەوەشاوەتەوە و ئەمڕۆ 15 گەشتی نێوان فڕۆکەخانەی نێودەوڵەتی نەجەف و کۆماری ئیسلامی ئێران هەیە".
بە هۆکاری سزاکانی ئەمریکا بۆ سەر ئێران، هەردوو کۆمپانیای مێنزیس بۆ خزمەتگوزاریی فڕۆکەوانی لە عێراق سنووردار (MASIL) و کۆمپانیای نیشتمانیی خزمەتگوزاریی فڕۆکەوانی (ناس) کە گرێبەستیان لەگەڵ فڕۆکەخانەکانی عێراق هەیە، بە فەرمی لە کاژێر 12:00ی شەوی سێشەممەوە کارەکانیان بۆ پێشوازی لە فڕۆکەکانی ئێرانی راگرت. بەم شێوەیەکی گەشتەکان بۆ فڕۆکەخانەی بەغدا راگیران، جگە لە فڕۆکەخانەی نێودەوڵەتیی نەجەف.
عەمار توفەیلی رایگەیاند، "هەردوو کۆمپانیای مێنزیس و ناس لە فڕۆکەخانەی نەجەف کارناکەن و کارگێڕی نەجەف خۆی کارەکان رێکدەخات".
سەرچاوەیەکی باڵا لە فڕۆکەخانەکانی عێراق ئەمڕۆ پێنجشەممە بە تۆڕی میدیایی رووداوی گوت، فڕۆکەخانەی نێودەوڵەتی نەجەف، ئیدارەیەکی تایبەتی خۆی هەیە. بەڕێوەبەری راگەیاندنی فڕۆکەخانەی نێودەوڵەتیی نەجەف-یش ئەمەی بۆ رووداو پشتڕاست کردەوە.
