رووداو دیجیتاڵ
لە ئەنجامی پێکدادانێک لەنێوان دەزگای دژەتیرۆری عێراق و چەکدارانی داعش لە سنووری نێوان کەرکووک و پردێ، دوو چەکداری داعش و مێرمنداڵێک کوژران، هاوکات دوو چەکداری دیکەی ئەو رێکخراوەش دەستگیرکراون.
رۆژی یەکشەممە، 27ـ ئەیلوولی 2026، سەرچاوەیەک لە هێزە ئەمنییەکانی کەرکووک بە تۆڕی میدیایی رووداوی راگەیاند، لەو رووبەڕووبوونەوەیەدا "دوو تیرۆریست دەستگیرکراون و دووی دیکەش کوژراون، هەروەها هاووڵاتییەکی سڤیلیش کە مێرمنداڵە گیانی لەدەستداوە."
ئەو سەرچاوەیە ئاماژەی بەوەش کرد، بەپێی زانیارییە سەرەتاییەکان یەکێک لە کارمەندانی دەزگای دژەتیرۆری عێراق بریندار بووە، بەڵام تاوەکو ئێستا ئەو زانیارییە بە فەرمی پشتڕاست نەکراوەتەوە.
پێشتر دەزگای دژەتیرۆری عێراق لە راگەیێندراوێکدا بڵاویکردەوە کە لە ئەنجامی پێکدادانی هێزەکانیان لەگەڵ چەکدارانی داعش لەنێوان کەرکووک و پردێ، دوو چەکداری داعش کە پشتێنی بۆمبڕێژکراویان بەستبوو، کوژراون.
بەگوێرەی راگەیێندراوەکەی دژەتیرۆری عێراق، رووبەڕووبوونەوەکە لەگەڵ گرووپێک چەکداری داعش بووە و بەهۆی شەڕ و ئۆپەراسیۆنەکەوە دەروازەکانی ناحیەی پردێ داخران.
موراد زانا، مێرمنداڵێکی کوردە لە شەڕەکەی پردێ گیانی لەدەستدا؛ بەگوێرەی دژەتیرۆری عێراق چەکدارە داعشەکان کاتێک هەڵاتوون، چوونەتە نێو مارکێتەکەی مورادەوە و لەوێ شەڕیان لەگەڵ دژەتیرۆری عێراق کردووە، بەهۆی رووبەڕووبوونەوەکەوە موراد گیانی لەدەستداوە.
