رووداو دیجیتاڵ
راوێژکاری ئەمنیی سەرۆکوەزیرانی عێراق دەڵێ، عێراق گەیشتووەتە وێستگەیەکی گرنگ بۆ کۆتاییهێنان بە ئەرکی هاوپەیمانیی نێودەوڵەتی و گواستنەوەی پەیوەندییەکان بۆ قۆناخی دوولایەنە، ئەوەش لەپێناو جێگیرکردنی سەروەریی نیشتمانی.
قاسم ئەعرەجی، رۆژی چووارشەممە(30ـی ئەیلوولی2026)، رایگەیاند: "وەک تەواوکەری ئەو گفتوگۆ و لێکتێگەیشتنانەی لە 22ی تەممووزی 2021وە دەستیان پێکردووە، ئەمڕۆ گەیشتووینەتە وێستگەیەکی گرنگ بۆ کۆتاییهێنان بە ئەرکی هاوپەیمانیی نێودەوڵەتی و بوونی هێزەکانیان لە عێراق."
راوێژکارە ئەمنییەکەی عەلی زەیدی دەڵێت: "ئەم هەنگاوە لە خزمەت بەرژەوەندییە نیشتمانییەکان و خواستەکانی گەلی عێراق دایە."
قاسم ئەعرەجی گوتی: "سەرکەوتن بەسەر داعشدا بەهۆی قوربانیی عێراقییەکان و قارەمانێتیی هێزە چەکدارەکان بووە، بە پاڵپشتیی هاوپەیمانیی نێودەوڵەتی و وڵاتانی دۆست و دراوسێ، کە عێراق رێز لەو رۆڵەیان دەگرێت."
قاسم ئەعرەجی گوتیشی: "کۆتاییهاتنی ئەرکی هاوپەیمانیی نێودەوڵەتی بە مانای کۆتاییهاتنی هاوبەشی نێوانیان نایەت، بەڵکو پەیوەندییەکان دەگۆڕدرێن بۆ پەیوەندیی دوولایەنەی بەهێزتر. دەشڵێت: "هاوئاهەنگییە ئەمنی و هەواڵگرییەکان و گۆڕینەوەی شارەزایی و زانیاری لەسەر بنەمای رێزی دوولایەنە و بەرژەوەندیی هاوبەش بەردەوام دەبن، تاوەکو سەقامگیریی ناوچەکە بپارێزرێت."
رۆژی 30ی ئەیلوول ئەو وادە فەرمیەیە کە لە رێگەی دانوستاندنەکانی لیژنەی باڵای سەربازیی نێوان بەغدا و واشنتن دیاریکرا بۆ کۆتاییهاتنی ئەرکی سەربازیی هاوپەیمانیی نێودەوڵەتی لە عێراق و رادەستکردنی بنکە سەربازییەکان بە هێزە ئەمنییەکانی عێراق، ئەو رۆژەشی بە رۆژی(سەروەریی نیشتمانی) ناوناوە.
