رووداو دیجیتاڵ
ئەمینداری گشتیی بزووتنەوەی نوجەبا داوا لە گەلانی ناوچەکە دەکات گرووپی چەکدار هاوشێوەی عێراق پێکبهێنن بۆ "دەرکردن"ی هێزەکانی ئەمریکا و دەڵێت، ئامادەن ئەزموونی خۆیان لەو بوارەدا بۆ وڵاتانی ناوچەکە بگوازنەوە.
رۆژی چوارشەممە، 11-03-2026، ئەکرەم کەعبی، ئەمینداری گشتیی بزووتنەوەی نوجەبا لە راگەیێندراوێکدا رەخنەی تووندی لەو وڵاتانەی ناوچەکە گرت کە رێگەیان داوە بنکەی سەربازیی ئەمریکا لەسەر خاکەکەیان هەبێت و گوتی: "بە رێگەدان بەم تاقمە تاوانبارانە بۆ ئەوەی خاکەکەتان وەک بنکەی سیخوڕی و هێرشکردنە سەر دراوسێ موسڵمانەکانتان بەکاربهێنن، شورەییتان بۆ خۆتان و وێرانکاریتان بۆ وڵاتەکانتان هێناوە."
ئەمینداری گشتیی نوجەبا ئاماژەی بەوە کرد، ئەو وڵاتانە پەلکێشی ناو "سەرکێشییەکانی نەتەنیاهووی زایۆنی و ئەمریکای گەمژە" کراون و هۆشداریی دانێ کە "دوای کۆتاییهاتنی شەڕ، دووژمنی مرۆڤایەتی دێت و پارەی تێچووی شەڕەکە و قازانجەکەشی لە ئێوە وەردەگرێت."
ئەکرەم کەعبی گومانی خستە سەر بێلایەنیی ئەو وڵاتانە و رایگەیاند: "چۆن دەڵێن بێلایەنن لەکاتێکدا بەشێکی زۆری کارە سەربازییەکانی ئەمریکا لە وڵاتەکانی ئێوەوە دەستپێدەکەن؟ رادارەکانتان کە بۆ خزمەتی ئیسرائیل و ئەمریکا چاودێریی هێزەکانی ئێران دەکەن، چاوی ئەوانن لە ناوچەکە و دەبێت ئەو چاوانە کوێر بکرێن."
بە گوتەی کەعبی، ئەو درۆنانەی هێرش دەکەنە سەر عێراق و ئێران، تەنیا دەتوانن لە بنکە نزیکەکانەوە بفڕن، هەر بۆیە داوای لە گەلانی وڵاتانی عەرەبی کرد گرووپی چەکدار پێکبهێنن بۆ "رزگارکردنی وڵاتەکانیان" لە ئیسرائیل و ئەمریکا.
لە کۆتایی راگەیێندراوەکەدا، ئەکرەم کەعبی ئامادەیی بزووتنەوەکەی نیشان دا بۆ گواستنەوەی هەموو ئەزموون و تواناکانیان بۆ ئەو گرووپە چەکدارانەی کە لە وڵاتانی ناوچەکەدا پێکدەهێنرێن.
بزووتنەوەی نوجەبا یەکێکە لە گرووپە چەکدارە شیعەکانی نزیک لە کۆماری ئیسلامیی ئێران و بەشێکە لە "موقاوەمەی ئیسلامی لە عێراق."
