رووداو دیجیتاڵ
بەرەبەیانیی ئەمڕۆ سێشەممە، چەند جارێک هێرش کرایە سەر بنکەی پشتیوانیی دیپلۆماسی و باڵیۆزخانەی ئەمریکا لە بەغدا و درۆنێک نزیک لە باڵیۆزخانە کەوتە خوارەوە. دەنگۆی کشانەوەی سوپای عێراقیش لە قائیم بڵاوبووەوە، بەڵام سەرچاوەیەکی ئەمنی دەڵێت، کشانەوەکە خۆ رێکخستنەوە بووە.
سەرچاوەیەکی ئەمنیی عێراق بە تۆڕی میدیایی رووداوی راگەیاند، هێرشەکان بە چوار درۆن کراون و سێیان تێکشکێنراون و یەکێکیشیان لە نزیک باڵیۆزخانە کەوتووەتە خوارەوە، بەڵام هیچ زیانێکی گیانی نەبووە.
دواتر گرووپی سەرایا ئەولیا دەم سەرجەم هێرشەکانی گرتە ئەستۆ.
هاوکات، نزیک کاژێر 03:00ی بەرەبەیانیی ئەمڕۆ، بە سێ مووشەک، بۆردوومانی ماڵێک لە ناوچەی جادرییەی بەغدا کرا و باس لە بەئامانجگرتنی چەند سەرکردەیەکی حەشدی شەعبی دەکەن.
بەگوێرەی میدیای نزیک لە حەشدی شەعبی، بەهۆی هێرشەکەوە شەش کەس کوژراون، بەڵام تاوەکو ئێستا ناسنامەی کوژراوەکان دیار نین.
کشانەوەی سوپا لە قائیم
میدیای نزیک لە حەشدی شەعبی گرتەیەکی ڤیدیۆییان بڵاوکردووەتەوە و باس لە کشانەوەی سوپای عێراق دەکەن لە بازگەکانی (ئەجباب، شەهید حەیدەر) لە سنووری قائیم لە ئەنبار و دەڵێن حەشدی شەعبییان بەجێهێشتووە.
ئەو کەسەی کە ڤیدیۆکەی تۆمارکردووە چەکدارێکی حەشدی شەعبییە و دەڵێت، "سوپا کەلوپەلەکانی کۆدەکاتەوە و دەکشێتەوە، سوێند بە عەلی لە ناوچەکە کشانەوە. تەنانەت ئەوانەی کاروباری ناوخۆش لە ناوچەکە کشانەوە و تەنیا ئێمەی حەشد ماوینەتەوە."
بەڵام سەرچاوەیەکی باڵای ئەمنیی عێراق بە رووداوی گوت، "کشانەوەکە لە چوارچێوەی خۆ رێکخستنەوەی فیرقەی 7ی سوپا بووە و سوپا لەگەڵ خۆرهەڵاتندا دەگەڕێنەوە شوێنی خۆیان."
سەرچاوەیەکی باڵاش لە ئۆپەراسیۆنە هاوبەشەکان دڵنیایی دا کە سوپا نەکشاوەتەوە و گوتی، "هەموویان لە شوێنی خۆیاندا دەبن."
