رووداو دیجیتاڵ
باڵیۆزی رووسیا لە عێراق لە کۆبوونەوەی لەگەڵ سەرۆک بارزانی رایگەیاند، وڵاتەکەی لە هەموو بارودۆخێکدا بە بایەخەوە سەیری پەیوەندییەکانی لەگەڵ هەرێمی کوردستان دەکات و سەقامگیریی هەرێمی کوردستانی بەلاوە گرنگە.
رۆژی چوارشەممە، 9ـی ئەیلوولی 2026، لە پیرمام سەرۆک مەسعود بارزانی پێشوازی لە ئیلبروس کوتراشێڤ، باڵیۆزی رووسیا لە عێراق کرد، کە بە بۆنەی کۆتاییهاتنی ئەرکەکانی و ماڵئاواییکردنەوە سەردانی سەرۆک بارزانی کردبوو.
بەپێی راگەیێندراوی بارەگای بارزانی، باڵیۆزی رووسیا سوپاسی سەرۆک بارزانی و دامەزراوەکانی هەرێمی کوردستانی کرد، کە لە ماوەی کارکردنیدا هاوکار و هەماهەنگ بوونە لە سەرخستنی ئەرکەکانیدا. هەروەها پێزانینیشی بۆ هەوڵەکانی سەرکردایەتیی هەرێمی کوردستان هەبوو کە رێگەیان نەداوە هەرێمی کوردستان ببێتە بەشێک لەو کێشە و ئاڵۆزییانەی لە ناوچەکەدا هەیە.
بەگوێرەی راگەیێندراوەکە، سەرۆک بارزانی ئاماژەی بە وێستگە گرنگەکانی پەیوەندیی نێوان گەلی کوردستان و رووسیا لە سەدساڵی رابردوودا دا و دەستخۆشی لە باڵیۆزی رووسیا لە عێراق کرد کە لە ماوەی کارکردنیدا رۆڵێکی گرنگی لە پەرەپێدانی پەیوەندییەکانی نێوان هەردوولا هەبووە و هیوای سەرکەوتنی لە ئەرک و کاری داهاتووی بۆ خواست.
لە بەشێکی دیکەی ئەو دیدارەدا، رۆشنایی خرایە سەر بارودۆخی سیاسی و گرژییەکانی ناوچەکە و کاریگەرییان لەسەر داهاتوو و سەقامگیریی سەر عێراق و ناوچەکە.
