رووداو دیجیتاڵ
سەرۆکی هەرێمی کوردستان و سەرۆکی ئەنجوومەنی نوێنەرانی عێراق لە هەولێر کۆبوونەوە. بەگوێرەی راگەیێندراوەی سەرۆکایەتی هەرێمی کوردستان، تیشکیان خستووەتە سەر دۆخی ناوخۆی وڵات، کۆنترۆڵکردنی چەک، پەیوەندییەکانی هەولێر و بەغدا و پەیوەندییەکانی عێراق لەگەڵ تورکیادا.
رۆژی پێنجشەممە، 10ـی ئەیلوولی 2026، نێچیرڤان بارزانی، سەرۆکی هەرێمی کوردستان، پێشوازیی لە هەیبەت حەلبووسی، سەرۆکی ئەنجوومەنی نوێنەرانی عێراق و شاندی یاوەری کرد.
وەک لە راگەیێندراوی کۆبوونەوەکەدا هاتووە، تەوەری سەرەکیی دیدارەکە تایبەت بوو بە دۆخی ناوخۆی وڵات؛ هەردوولا هاوڕا بوون کە ئاسایش و سەقامگیریی عێراق و هەرێمی کوردستان پێکەوە بەستراونەتەوە. هاوکات لە پرسی کۆنترۆڵکردنی چەک لە دەستی دەوڵەتدا، سەرۆک نێچیرڤان بارزانی پشتیوانیی هەرێمی کوردستانی بۆ سەرۆکوەزیران و حکومەتی فیدراڵ و چارەسەرکردنی ئەم بابەتە لە رێگەی دیالۆگ و لێکگەیشتنەوە دووپات کردەوە، بە جۆرێک مسۆگەری ئەوە بکات کە چەک تەنیا بە دەست دەوڵەتەوە بێت.
هەروەها گرنگیی چارەسەرکردنی کێشەکانی هەولێر - بەغدا بەپێی دەستوور، مسۆگەرکردنی ماف و شایستەکانی هەموو پێکهاتەکان و پرسی بودجەی هەرێمی کوردستان، لەگەڵ دوایین پێشهاتەکانی ناوچەکە و لێکەوتەکانیان تەوەرێکی دیکەی دیدارەکە بوون. بەگوێرەی راگەیێندراوی سەرۆکایەتی هەرێم باس لە گرنگیی تەبایی و هەماهەنگیی سەرجەم لایەن و پێکهاتە عێراقییەکان کرایەوە بۆ بەرەنگاربوونەوە و تێپەڕاندنی ئاڵنگارییەکان.
لە راگەیێندراوەکەدا ئاماژە بەوەشکراوە پەیوەندییەکانی دەرەوە تاوتوێ کراون و سەرۆکی ئەنجوومەنی نوێنەرانی عێراق پوختەیەکی دەربارەی سەردانی فەرمیی خۆی بۆ تورکیا و کۆبوونەوەکانی لەگەڵ سەرکۆمار و بەرپرسانی باڵای ئەو وڵاتە خستووەتە روو. لەمبارەیەوە سەرۆک نێچیرڤان بارزانی جەختی لە گرنگیی پەیوەندییەکانی عێراق لەگەڵ تورکیادا کردەوە و ئاماژەی بەوە دا کە پەرەپێدانی هاوکاریی هاوبەش لە بەرژەوەندیی هەردوولادایە.
سەردانەکەی سەرۆکی ئەنجوومەنی نوێنەرانی عێراق و شاندی یاوەری، کە پێکهاتبوون لە ژمارەیەک سەرۆک فراکسیۆن، بە مەبەستی پێشکەشکردنی پرسە و سەرەخۆشی بوو بۆ کۆچی دوایی خوالێخۆشبوو عەبدولواحید ئیبراهیم شێخ عەبدولسەلام بارزانی. لەو چوارچێوەیەدا، سەرۆکی هەرێمی کوردستان سوپاس و پێزانینی بۆ سەردان و هاوخەمییان دەربڕی.
