رووداو دیجیتاڵ
بڕیارە سەرەتای هەفتەی داهاتوو لە شاری هەولێر، داڕشتنی ستراتیژییەتی نیشتمانیی گەشتوگوزاریی عێراق و هەرێمی کوردستان تاوتوێ بکرێ.
عەلی یاسین، گوتەبێژی دەستەی گەشتوگوزاری عێراق، رۆژی دووشەممە، 14ی ئەیلوولی 2026، بە تۆڕی میدیایی رووداوی راگەیاند، رۆژی شەممەی داهاتوو، 19ی مانگ، لە شاری هەولێر دووەمین وۆرکشۆپی تایبەت بە داڕشتنی ستراتیژییەتی نیشتمانیی گەشتوگوزار بەڕێوەدەچێ.
گوتەبێژی دەستەی گەشتوگوزاری عێراق ئاماژەی بەوە کرد، یەکەم وۆرکشۆپ لە بەغدا بەڕێوەچوو و ئەمەش دەبێتە دووەمین وۆرکشۆپ، کە سەرۆکی دەستەی گەشتوگوزاری عێراق، سەرۆکی دەستەی گەشتوگوزاری هەرێمی کوردستان و لایەنە پەیوەندیدارەکانی دیکە تێیدا بەشدار دەبن.
بەگوتەی عەلی یاسین، "دیدگاکە پشت بە وەبەرهێنان لە توانا گەشتیارییەکانی عێراق دەبەستێت، کە میراتی شارستانی، کولتووری، ئایینی و ژینگەیی لەخۆدەگرێ، ئەمەش لە رێگەی پەرەپێدانی ژینگەی یاسادانان و رێکخستن، پتەوکردنی وەبەرهێنانی گەشتیاری و نوێکردنەوەی پێکهاتەی دامەزراوەیی کەرتەکەوە دەبێت".
عەلی یاسین گوتیشی: "ستراتیژییەتەکە جەخت لەسەر جێبەجێکردنی پێوەرە نێودەوڵەتییەکان لە پۆلێنکردنی دامەزراوە گەشتیارییەکان، فراوانکردنی هاوبەشی لەگەڵ کەرتی تایبەت، گەشەپێدانی گەشتیاریی ژینگەیی و لادێی، هەروەها بەشداریکردنی کۆمەڵگە خۆجێیەکان لە پشتگیریکردنی گەشەپێدانی بەردەوام و رەخساندنی هەلی کار دەکاتەوە".
