رووداو دیجیتاڵ
سەرۆکی هەرێمی کوردستان پێشوازی لە کۆنسووڵی گشتیی نوێی فەرەنسا کرد و جەختی لە ئامادەیی دامەزراوەکانی هەرێمی کوردستان بۆ سەرخستنی کارەکانی کردەوە؛ کۆنسووڵی فەرەنساش دەڵێت، وڵاتەکەی پابەندە بە برەودان بە پەیوەندییەکانی لەگەڵ هەولێر.
بەپێی راگەیێندراوێکی سەرۆکایەتیی هەرێمی کوردستان، بەیانیی ئەمڕۆ یەکشەممە، 20ـی ئەیلوولی 2026، نێچیرڤان بارزانی، سەرۆکی هەرێمی کوردستان پێشوازیی لە باڵیۆز ئیمانوێل مینیۆ، کونسوڵی گشتیی نوێی فەرەنسا لە هەرێمی کوردستان کرد.
لە دیدارەکەدا، نێچیرڤان بارزانی وێڕای پیرۆزبایی بۆ دەستبەکاربوونی، هیوای سەرکەوتنی لە ئەرکەکەیدا بۆ کونسوڵی نوێ خواست و پێی راگەیاند: "ئامادەیی تەواوی دامودەزگاکانی هەرێمی کوردستان بۆ سەرخستنی کارەکانت دووپاتدەکەینەوە."
سەرۆکی هەرێمی کوردستان هاوکات "سوپاس و پێزانینی هەرێمی کوردستان بۆ مێژووی پەیوەندیی دۆستانە و پشتیوانیی بەردەوامی فەرەنسا بۆ گەلی کوردستان" دووپاتکردەوە.
لەلای خۆیەوە، ئیمانوێل مینیۆ، کۆنسووڵی گشتیی نوێی فەرەنسا خۆشحاڵیی خۆی بەدەستبەکاربوونی لە هەرێمی کوردستان دەربڕی و گوتی: "فەرەنسا پابەندە و خواستی هەیە بۆ برەودان بە پەیوەندییە لەمێژینەکانی لەگەڵ هەرێمی کوردستان و فراوانکردنی ئاستی هاوکاریی هاوبەش لە بوارە جیاوازەکاندا."
هەر بەپێی راگەیێندراوەکە، "پەیوەندییەکانی نێوان هەولێر و بەغدا و بارودۆخی گشتیی عێراق و ناوچەکە تەوەرێکی دیکەی دیدارەکە بوون."
