رووداو دیجیتاڵ
کارکردن بۆ ئامادەکردنی لیستی مووچەی مانگی ئەیلوول (مانگی 9)ـی فەرمانبەران و مووچەخۆرانی هەرێمی کوردستان بەردەوامە و سەرچاوەیەک لە وەزارەتی دارایی رایدەگەیێنێت، بە ئەگەرێکی زۆرەوە هەفتەی داهاتوو کارەکانی تەواو دەبێت و رەوانەی بەغدا دەکرێت.
رۆژی دووشەممە 21ـی ئەیلوولی 2026، سەرچاوەیەک لە وەزارەتی دارایی و ئابووریی هەرێمی کوردستان بە تۆڕی میدیایی رووداوی راگەیاند: "کارکردن لە لیستی مووچەی مانگی ئەیلوول بەردەوامە و تاوەکو ئێستا کارەکانی کۆتایی نەهاتووە، بەڵام بە ئەگەرێکی زۆرەوە هەفتەی داهاتوو هەموو کارەکانی تەواو دەبێت."
سەبارەت بە شێوازی رادەستکردنی لیستەکەش، ئەو سەرچاوەیە ئاماژەی بەوە کرد، وەک مانگەکانی رابردوو دوای تەواوبوونی، لیستەکە لەلایەن شاندێکی تەکنیکیی وەزارەتی داراییەوە لەگەڵ تەرازووی پێداچوونەوەی مانگی ئاب (مانگی 8) دەنێردرێتە بەغدا.
رۆژی 14ـی ئەیلوول، وەزارەتی دارایی لیستی مووچەی مانگی ئابـی مووچەخۆرانی هەرێمی کوردستانی راگەیاند و لە 15ـی ئەیلوول دەست بە دابەشکردنی کرا، 19ـی ئەیلوولیش دابەشکردنی مووچەی سەرجەم وەزارەت و دامەزراوەکان تەواو بوو.
