نێچیرڤان بارزانی پیرۆزبایی رۆژی نیشتمانیی سعودیە دەکات

رووداو دیجیتاڵ

سەرۆکی هەرێمی کوردستان بەبۆنەی رۆژی نیشتمانیی شانشینی عەرەبیی سعودیەوە پەیامێکی پیرۆزبایی ئاراستەی پاشا و شازادەی جێنشینی سعودیە کرد و جەختی لەخواستی هەرێمی کوردستان بۆ بەهێزکردنی پەیوەندییەکان لەگەڵ ئەو شانشینە کردەوە.

نێچیرڤان بارزانی لەهەژماری فەرمیی خۆی لەتۆڕی کۆمەڵایەتیی (ئێکس) پەیامێکی بڵاوکردەوە و تێی دا هاتووە: "بەبۆنەی رۆژی نیشتمانیی شانشینی عەرەبیی سعودیەوە، گەرمترین پیرۆزبایی ئاراستەی خادیمی حەرەمەینی شەریفەین شا سەلمان بن عەبدولعەزیز ئال سعود، هەروەها ئاراستەی شازادەی جێنشین و سەرۆکی ئەنجوومەنی وەزیران خاوەن شکۆی شاهانە محەممەد بن سەلمان بن عەبدولعەزیز ئال سعود و حکومەت و گەلی برای شانشینی عەرەبیی سعودیە دەکەم."

سەرۆکی هەرێمی کوردستان هیوای گەشەسەندنی زیاتری بۆ شانشینی سعودیە خواستووە و ئاماژەی بەپەیوەندیی دۆستانەی نێوان هەولێر، بەغدا و ریاز کردووە: "هیوای پێشکەوتن و گەشەسەندنی بەردەوام بۆ شانشین و گەلەکەی دەخوازم، هاوکات شانازی بەپەیوەندیی دۆستانە و هاوکاریی نێوان عێراق و هەرێمی کوردستان لەگەڵ شانشینی سعودیە دەکەین."

لەکۆتایی پەیامەکەی دا، نێچیرڤان بارزانی جەختی لەسەر ئایندەی پەیوەندییەکانی هەرێمی کوردستان لەگەڵ سعودیە کردووەتەوە و دەڵێت: "چاومان لەوەیە ئەو پەیوەندییانە بەرهەمدارتر ببن و ئاسۆکانی فراوانتر بکرێن، بەجۆرێک لەخزمەت بەرژەوەندییە هاوبەشەکان دا بێت و ببێتە مایەی چەسپاندنی ئاسایش و سەقامگیری لەناوچەکە دا."