رووداو دیجیتاڵ
کەشناسان پێشبینی دەکەن ئەم وەرزەی بارین لە هەرێمی کوردستان وەرزێکی باراناوی دەبێت و مەترسیی دروستبوونی لافاو لە هەندێ ناوچەش دەبێ. پارێزگاری هەولێر دەڵێ، ئامادەکارییان کردووە بۆ رێگری لە لافاو.
ئومێد خۆشناو، پارێزگاری هەولێر، ئەمڕۆ هەینی 25ی ئەیلوول بە تۆڕی میدیایی رووداوی گوت: "هەموو ئامادەکارییەک کراوە بۆ ئەوەی ئەم وەرزەی بارین رێگری لە لافاو بکرێ، بۆ ئەوەش سەرۆکایەتیی شارەوانی، بەڕێوەبەرایەتیی شارەوانییەکان، ئاودێری، پاراستنی رێگەوبان و ئاوەڕۆی هەولێر رێکارەکانیان گرتووەتە بەر".
پارێزگاری هەولێر دەڵێ، مەنهۆڵەکان و رێڕەوەکانی ئاو لە هەولێر و دەوروبەری تەواو خاوێن کراونەتەوە؛ ئاماژەی بەوەش کرد: "لە دوو ساڵی رابردوودا چەندین گۆم و بەنداو دروست کراون، هەروەها هەڵکەندن و دروستکردنەوەی رێڕەوە سرووشتییەکانیش مەترسییەکانی لافاویان لە هەولێر کەمتر کردووەتەوە".
ئومێد خۆشناو باسی چەند رێگەیەکی دیکەی بۆ رێگری لە لافاو کرد و گوتی: "ژمارەیەک ئاوەڕۆی سندووقی و لوولەیی پێشتر دروست کراون و هۆکار بوون ساڵی پار لافاو لە هەولێر دروست نەبێ و ئەم ساڵیش خاوێنکراونەتەوە".
پارێزگاری هەولێر گوتی، بەگوێرەی پێشبینییەکان ئەم وەرزەی بارین "بارانی زۆر" دەبارێ و رێکارەکانی ئەوانیش بۆ رێگرییە لە لافاو، "هاوشێوەی پارە، کە سێ بەرامبەری ساڵانی دیکە باران باری و هیچ لافاوێک دروست نەبوو".
