رووداو دیجیتاڵ
لە تیروپشکێکدا ناوی ئەو کەسانە هەڵبژێردرا، کە لە دوو ساڵی داهاتوودا مافیان دەبێت بچنە حەج.
تیروپشکەکە ئەمڕۆ سێشەممە 29-09-2026 بەڕێوە چوو، تێیدا 2797 کەس بۆ چوونە حەج لە ساڵی 2027 هەڵبژێردران، جگە لەو یەدەگانەی پێشووتر کە زیاتر لە 2400 کەسن و ساڵی داهاتوو دەچنە حەج و هەموویان لە رێگەی نامەوە ئاگادار دەکرێنەوە.
کاروان ستوونی، گوتەبێژی حەج و عومرەی هەرێمی کوردستان، ئەمڕۆ سێشەممە بە تۆڕی میدیایی رووداوی گوت: "لە تیروپشکی ئەمڕۆدا ناوی ئەو کەسانەش هەڵبژێردران، کە ساڵی 2028 مافیان هەیە بچن بۆ حەج، کە پشکی ساڵانەی هەرێمی کوردستان 5120 کەسە".
بە گشتی ئەم ساڵ 120 هەزار و 142 کەس ناویان تۆمار کردبوو بچنە حەج. لەو ژمارەیە 116 هەزار و 693 وەک هاووڵاتیی ئاسایی ناویان تۆمار کردبوو؛ 602 مورشیدی ئایینی، 255 کۆمپانیا وەکو سەرقافڵە، 243 پزیشک و 2340 کەسیش وەک کەسوکاری شەهیدان ناویان تۆمار کردووە.
پار ناونووسین بۆ حەج، لە 11ی ئەیلوول دەستی پێکرد و 26ی هەمان مانگ کۆتایی هات. زیاتر لە 90 هەزار کەس داواکارییان لە رێگەی فۆرمی ئەلیکترۆنی پڕ کردەوە، لەو ژمارەیە 5120 کەس بە تیروپشک ناویان دەرچوو.
