.webp&w=3840&q=75)
رووداو دیجیتاڵ
دوای بڵاوبوونەوەی دەنگۆی خنکانی 18 هاونیشتمانی لە کەناراوەکانی لیبیا، بەرپرسی کۆچ و کۆچبەرانی ئیدارەی سەربەخۆی راپەڕین لە پارێزگای سلێمانی دەڵێ، پشکنینی دی ئێن ئەی بۆ کەسوکاری کۆچبەرانی هەرێمی کوردستان کراوە و بۆ دڵنیابوونەوە رەوانەی لیبیا دەکرێ.
رۆژی یەکشەممە 4ـی تشرینی یەکەمی 2026 عوسمان مستەفا، بەرپرسی کۆچ و کۆچبەرانی ئیدارەی سەربەخۆی راپەڕین بە رووداوی گوت: "لەسەر داوای وەزارەتی ناوخۆی هەرێمی کوردستان و کەسوکاری ئەو کۆچبەرانەی بێسەروشوێنن، پشکنینی دی ئێن ئەی بۆ 16 کەس لە ئیدارەی راپەڕین ئەنجامدرا".
ئەو بەرپرسەی ئیدارەی راپەرین روونیکردەوە: 'دەمانەوێ چارەنووسی ئەو کۆچبەرانە یەکلا بێتەوە. بۆ ئەو مەبەستەش هەفتەی رابردوو پشکنینەکانمان تەواوکردن و لە رێگەی لیژنەیەکی وەزارەتی ناوخۆ و بەڕێوەبەرایەتیی بەڵگە و تاوان رەوانەی سەنتەری گشتیی دی ئێن ئەی پارێزگای هەولێر کرا. پێشبینیی دەکرێ ئێوارەی ئەمڕۆ پشکنینەکان دەربچن".
عوسمان مستەفا روونیکردەوە، دوای دەرچوونی پشکنینەکان، سەنتەری دی ئێن ئەی لە هەولێر ئەنجامەکان رادەستی وەزارەتی ناوخۆی هەرێمی کوردستان دەکات، ئەوانیش لە رێگەی وەزارەتی دەرەوەی عێراق دەیدەنە باڵیۆزخانەی عێراق لە لیبیا و لەگەڵ دی ئێن ئەی کۆچبەرە خنکاوەکان بەراورد دەکرێ.
بەگوێرەی داتاکانی ئیدارەی سەربەخۆی راپەرین، ئەو کەسانەی پشکنینی (دی ئێن ئەی)یان بۆ کراوە 16 هاونیشتمانین؛ 12 کەسیان دانیشتووی ئیدارەی راپەڕینن و سێ کەسی دیکەش دانیشتووی قەزای چەمچەماڵ و یەک کەسیش دانیشتووی دووکانە.
22 ئەیلوولی 2026 رەنج پشدەری، چالاکڤانی کۆچبەران لە ئەورووپا بە رووداوی راگەیاند: "بەلەمێکی کۆچبەران لە دەریای نێوەڕاست پێش زیاتر لە مانگێک ژێرئاو کەوتووە و دەرکەوتووە 18 کۆچبەری کورد تێیدا خنکاون". بەڵام هەرزوو کۆمەڵەی پەنابەرە گەڕاوەکان لە ئەورووپا گوتی: "هیچ کۆچبەرێکی کورد لە نێو ئەو 18 کەسەدا نییە".
هەر ئەمڕۆ یەکشەممە، بەکر عەلی، سەرۆکی کۆمەڵەی پەنابەرە گەڕاوەکان لە ئەورووپا بە رووداوی راگەیاند: "دڵنیاین ئەو تەرمانەی لە کەناراوەکانی لیبیا دۆزراونەتەوە کورد نین".
سەرۆکی کۆمەڵەی پەنابەرە گەڕاوەکان لە ئەوروپا ئاماژەی بەوەکرد: "دوای بڵاوبوونەوەی هەواڵەکە هەموو هەوڵی خۆمان دا تاوەکو چارەنووسی ئەو کۆچبەرانە یەکلابکەینەوە، بەڵام تاوەکو ئێستا هیچ بەڵگەیەکی یەکلاییکەرەوە دەستنەکەوتووە کە ئەو 18 کۆچبەرەی خنکاون کورد بن".
