رووداو دیجیتاڵ
لە سنووری پردێ و لە سەر رێگەی کەرکووک-هەولێر سوپای عێراق و پۆلیسی گومرگ بازگەیەکی نوێیان داناوە و بازگەکە نزیکە لە بازگەی هاوبەشی پێشمەرگە و سوپای عێراق.
لە بارەی دانانی بازگەکەوە سەرچاوەیەک لە سوپای عێراق بە رووداوی راگەیاند: "بازگەکە بۆ ئۆتۆمبێلی بارهەڵگرە بە هاوبەشی لەگەڵ پۆلیسی گومرگ و فەوجی 2ـی سەر بە لیوای 30ـی سەر بە فیرقەی 8ـی هێزەکانی سوپا، لە کۆتایی سنووری پردێیە و زۆر نزیکە لە بازگەی هێزەکانی پێشمەرگەوە."
هاوکات سەبارەت بە دانانی ئەو بازگەیە، عەبدولموتەلیب نەجمەدین، بەڕێوەبەری ناحیەی پردێ بە تۆڕی میدیایی رووداوی گوتی: "هیچ هەماهەنگییەکیان لەگەڵ نەکراوە و ئاگاداری دانانی بازگەکە نین و بە فەرمانی فەرماندەیی ئۆپەراسیۆنەکان دادەنرێت."
سەرچاوەیەکیش لە پۆلیسی گومرگ بە رووداوی راگەیاند: "بازگەکە بۆ دڵنیابوونەوەیە لەو بارهەڵگرانەی لە کەرکووکەوە بەرەو هەولێر دەڕۆن."
دانانی ئەم بازگە نوێیە لە کاتێکدایە لە پێشتر بازگەی دارەمان هەیە و دوای ئەوەش دەیان خاڵی سەربازیی سوپا هەن کە رێگە بە هاتنە ناوەوەی بارهەڵگر نادرێت، دانانی پۆلیسی گومرگ لە رێگەی هاتنە دەرەوە لە سنووری کەرکووکەوە پێچەوانەی کاری دەستەی خاڵە گومرگییەکانە.
