رووداو دیجیتاڵ
پۆلیسی پارێزگای کەرکووک دوو گەنجی لە قەزای دووبز دەستگیر کرد کە لە راستەوخۆی تیکتۆک، هەواڵی ناڕاست و پڕوپاگەندەیان لەبارەی دۆخی ئەمنیی ناوچەکە بڵاودەکردەوە. پۆلیس دەڵێت: "رێگە بە هیچ هەوڵێک نادەین بۆ تێکدانی ئاسایشی کۆمەڵایەتی."
عەقید عامر شوانی، گوتەبێژی پۆلیسی کەرکووک، رۆژی یەکشەممە، 11ـی تشرینی یەکەمی2026، بە رووداوی راگەیاند: "ئەم ئۆپەراسیۆنە لەسەر فەرمانی راستەوخۆی لیوا فەتاح مەحموود خەفاجی، فەماندەی پۆلیسی کەرکووک ئەنجامدراوە، بە مەبەستی چاودێریکردنی سۆشیاڵ میدیا و رووبەڕووبوونەوەی هەر کەسێک کە بیەوێ ترس و دڵەڕاوکێ لەناو هاووڵاتیاندا دروست بکات."
عەقید عامر شوانی گوتی: "مەفرەزەکانی بەشی پۆلیسی دووبز توانیویانە ئەو دوو گەنج بدۆزنەوە کە لە پلاتفۆرمەکانی سۆشیاڵ میدیاوە پەخشی راستەوخۆیان کردبووەوە و بە ئەنقەست زانیاریی نادروستیان دەربارەی تێکچوونی دۆخی ئەمنیی قەزاکە بڵاودەکردەوە".
گوتەبێژی پۆلیسی کەرکووک گوتیشی: "دەزگا ئەمنییەکان لە جووڵەیەکی خێرادا شوێنی تۆمەتبارەکانیان دۆزییەوە و دەستگیریان کردن".
عەقید عامر شوانی راشیگەیاند: "تەواوی رێکارە یاساییەکان بەرامبەریان گیراوەتە بەر و ئێستا راگیراون تاوەکو رادەستی دادگە بکرێن و بەپێی یاسا سزای خۆیان وەربگرن."
بەپێی یاسای سزادانی عێراقی، بڵاوکردنەوەی هەواڵی ناڕاست بە مەبەستی شڵەژاندنی رای گشتی، سزای بەندکردن و پێبژاردنی دارایی لەسەرە.
