رووداو دیجیتاڵ
لە رۆژی پێنجشەممەوە لە سنووری پارێزگای کەرکووک دەست بە دابەشکردنی نەوتی ماڵاندا دەکرێت. سەرۆکی لێژنەی خزمەتگوزارییەکان لە ئەنجوومەنی پارێزگای کەرکووک دەڵێ، دابەشکردنەکە لە رێی کی کارد دەبێت و 100 لیتر نەوت بە نرخی پاڵپشتیکراو بە 20 هەزار دینار دەدرێتە هاووڵاتییان.
رۆژی یەکشەممە، 11ـی تشرینی یەکەمی 2026، د. ئەحمەد کەرکووکی، سەرۆکی لێژنەی خزمەتگوزارییەکان لە ئەنجوومەنی پارێزگای کەرکووک بە تۆڕی میدیایی رووداوی راگەیاند: "بڕیارە رۆژی 15ـی تشرینی یەکەمی 2026، وەک ساڵانی رابردوو ئەگەر هیچ رووداوێک نەیەتە پێشەوە، لە پارێزگای کەرکووک دەست بە دابەشکردنی نەوتی ماڵان بکرێت."
دەربارەی میکانیزمی دابەشکردنەکە، د. ئەحمەد کەرکووکی گوتی: "دابەشکردنی نەوتەکە بە سیستمی دیجیتاڵی و لە رێی کی کارد دەبێت، ئەوەش لەپێناو ئەوەی هەموو هاووڵاتییان بە یەکسانی لێی سوودمەند بن."
سەرۆکی لێژنەی خزمەتگوزارییەکان ئاماژەی بەوەش کرد، پڕۆسەی دابەشکردنەکە سەرەتا لە سەنتەری شاری کەرکووکەوە دەستپێدەکات و دوای تەواوبوونی سەنتەر، لە دەوروبەری شارەکە و شارۆچکەکان دابەش دەکرێت.
لەبارەی بڕ و نرخەکەشی، د. ئەحمەد کەرکووکی دەڵێ: "نەوتەکە بە نرخی پاڵپشتیکراو دابەش دەکرێت و وەک ساڵانی رابردوو 100 لیتر بە 20 هەزار دینار دەبێت."
لە هەرێمی کوردستان تاوەکو ئێستا کاتی دابەشکردنی نەوتی ماڵان دیار نییە. لە کاتێکدا ساڵانی رابردوو لە مانگی ئەیلوولەوە دەست بە دابەشکردنی نەوت دەکرا.
ئایاری ئەم ساڵ بەرمیلێک نەوت لە هەرێمی کوردستان بە 160 هەزار دینار بوو، نێوەڕاستی مانگی تەمموز گەیشتە 200 هەزار دینار و مانگی ئەیلوولیش گەیشتە 325 هەزار دینار.
