بڕیارێکی عێراق کەرتی پەلەوەریی هەرێمی کوردستان دەخاتە مەترسییەوە

رووداو دیجیتاڵ

بڕیارێکی سەرۆکوەزیرانی عێراق بۆ هەڵگرتنی باج و گومرگ لەسەر هاوردەکردنی گۆشت، مریشک و هێلکە، کەرتی پەلەوەری لە هەرێمی کوردستانی خستووەتە مەترسییەوە. خاوەن پەلەوەرخانەکان دەڵێن، بڕیارەکە زیانێکی زۆریان پێدەگەیەنێت و وەزارەتی کشتوکاڵی هەرێمی کوردستانیش داوای هەڵوەشاندنەوەی دەکات.

دەوەن موحسین، یەکێکە لە خاوەن پەلەوەرخانەکانی هەولێر و 100 هەزار مریشکی ئامادەیە بۆ خستنە بازاڕ، بەڵام بڕیارەکەی عەلی زەیدی، سەرۆکوەزیرانی عێراق، کێشەی بۆ فرۆشتنی بەرهەمەکانیان لە شارەکانی خواروو و نێوەڕاستی عێراق دروستکردووە.

دەوەن موحسین، دەڵێت، "ئەم بڕیارەی سەرۆکوەزیرانی عێراق زیانێکی زۆر لە ئێمەی خاوەن پەلەوەرخانەکان دەدات. لە بری ئەوەی باج و گومرگی لەسەر گەنمەشامی و سۆیا و ئەو پێداویستیانە هەڵگرتبا کە پێویستمانە، رێگە بە هاوردەکردنی بەرهەمی ئامادەکراو دەدات."

دوای بڕیارەکە، وەزیری کشتوکاڵی هەرێمی کوردستان ناڕەزایەتیی 2,036 خاوەن پەلەوەرخانەی گەیاندووەتە سەرۆکوەزیرانی عێراق و داوای هەڵوەشاندنەوەی بڕیارەکەی کردووە.

رزگار حەمەد، راوێژکاری وەزارەتی کشتوکاڵی هەرێمی کوردستان رایگەیاند، "ئێمە بە نووسراوی فەرمی نیگەرانیی خۆمان گەیاندووەتە سەرۆکوەزیران و وەزارەتی کشتوکاڵی عێراق کە دەبێت بڕیارەکە هەڵبوەشێتەوە، چونکە لە بەرژەوەندیی خاوەن پەلەوەرخانەکان نییە و هەمووان زەرەرمەند دەبن."

ساڵانە لە هەرێمی کوردستان 450 هەزار تۆن گۆشتی مریشک بەرهەم دەهێندرێت، کە تەنیا 150 هەزار تۆنی بۆ پێداویستیی نێوخۆیە و 300 هەزار تۆنەکەی دیکەی رەوانەی بازاڕەکانی عێراق دەکرێت.

هەروەها بەرهەمی هێلکە ساڵانە دەگاتە 4 ملیار و 800 ملیۆن، کە 1 ملیار و 800 ملیۆنی بۆ پێداویستیی نێوخۆییە و 3 ملیارەکەی دیکەی بۆ بازاڕەکانی خواروو و نێوەڕاستی عێراق دەنێردرێت.