رووداو دیجیتاڵ
دوای 12 ساڵ لە پشتیوانیی هێزی هاوپەیمانان، پرسیاری سەرەکی ئەوەیە ئایا پشتیوانیی نێودەوڵەتی بۆ هێزی پێشمەرگە چۆن دەبێت؟ بەرپرسانی کورد گەشبینن و دەڵێن، پێشمەرگە هێزێکی دەستوورییە و لە هەر رێککەوتنێکی نوێی عێراقدا لەگەڵ وڵاتان، پەراوێز ناخرێت.
لە مێڕی، ئەو وڵاتانەی کە لە چوارچێوەی هێزی هاوپەیمانیدا پشتیوانیی پێشمەرگە و عێراقیان دەکرد، وەک "هاوبەش" پێناسە کران نەک "بەخشەر". ئێستا کە عێراق دەتوانێت هاوبەشیی ئەمنی لەگەڵ هەر وڵاتێک بکات، پرسیارەکە لەسەر چارەنووسی پێشمەرگەیە.
باڵیۆزانی ئیتاڵیا، فینلەندا و رۆمانیا، کە وڵاتەکانیان ئەندامی هاوپەیمانییەکە بوون، لە پانێڵێکدا باسیان لەوە کرد کە عێراق چووەتە قۆناخێکی تازەوە و پاراستنی ئاسایش و سەقامگیری کەوتووەتە سەر شانی خۆی.
نیکۆڵۆ فۆنتانا، باڵیۆزی ئیتاڵیا لە عێراق رایگەیاند: "ئێمە ئامادەین بەگوێرەی داواکاریی حکومەتی عێراق و حکومەتی هەرێمی کوردستان بگەڕێینەوە و زیاتر سەرنج بدەینە سەر مەشقپێدان و هەواڵگیری و بەرزکردنەوەی توانا."
لای خۆیەوە، فەڕەنسا کە دۆستێکی دێرینی کوردە، لە گفتوگۆدایە بۆ رێککەوتنێکی ئەمنی لەگەڵ عێراق و کۆنسوڵەکەی لە هەولێر جەخت دەکاتەوە کە پێشمەرگە لەو رێککەوتنە بێبەش نابێت.
ئیمانوێل مینیۆ، کۆنسوڵی فەڕەنسا لە هەولێر بۆ رووداو گوتی: "سەرۆکوەزیرانی عێراق لە پاریس بوو، بەیاننامەیەک هەبوو کە ئاماژەی بە گفتوگۆ بۆ رێککەوتننامەیەکی بەرگریی نوێ دابوو. بێگومان هاوبەشی لەگەڵ عێراق، واتە هاوبەشی لەگەڵ کوردستان."
بەرپرسانی کورد بە پشتبەستن بەوەی پێشمەرگە هێزێکی دەستوورییە، گەشبینن. جەبار یاوەر، ئەمینداری پێشووی وەزارەتی پێشمەرگە دەڵێت: "پێشمەرگە بەپێی بڕگەی 5ـی ماددەی 121ـی دەستوور هێزێکی دەستوورییە، بۆیە نە لە عێراق و نە لە ئاستی نێودەوڵەتیشدا ناتوانرێت پەراوێز بخرێت."
هاوکات، هۆشیار سیوەیلی، بەرپرسی مەکتەبی پەیوەندییەکانی دەرەوەی پارتی دیموکراتی کوردستان ئاماژەی بەوە کرد: "ئێمە دەزانین ئەمریکا، ئەڵمانیا و بەریتانیا لە گفتوگۆدان لەگەڵ لایەنی عێراقی، بەڵام هێشتا نازانرێت ئەم گفتوگۆیانە چەندە دەخایەنن و چ جۆرە رێککەوتنێکی لێ دروست دەبێت."
لە لایەکی دیکەوە، بافڵ تاڵەبانی، سەرۆکی یەکێتیی نیشتمانیی کوردستان پێیوایە ئەمریکا نزیکە و هەر کاتێک بیەوێت دەتوانێت بگەڕێتەوە و دەڵێت: "ئەمریکا ناچێت بۆ مەریخ، ئەمریکا دەچێت بۆ ئوردن، 17 خولەک بە فڕۆکە دوورە، بیەوێت بێتەوە بە چەقەنەیەک دێتەوە."
هاوپەیمانیی نێودەوڵەتی دژی داعش لە ماوەی 12 ساڵی رابردوودا، مەشقیان بە پێشمەرگە دەکرد و چەک و زانیاریی هەواڵگرییان پێدەدان. ئێستاش بەرپرسانی پێشمەرگە جەخت لەوە دەکەنەوە کە هێزەکەیان بۆ بەرگریکردن لە هەر هەڕەشەیەک ئامادەیە.
