رووداو دیجیتاڵ
وەزارەتی پێشمەرگە ئەو دەنگۆیانە رەتدەکاتەوە گوایە هێزەکانیان هێرشیان کردبێتە سەر بارەگایەکی حەشدی شەعبی لە سنووری پارێزگای سەلاحەدین و رایدەگەیێنێت، پێشمەرگە بەشێک نییە لە ململانێ سەربازییەکانی ناوچەکە.
رۆژی شەممە، 14ـی ئاداری 2026، وەزارەتی پێشمەرگە لە راگەیێندراوێکدا بڵاویکردەوە، لە چەند کەناڵ و پەیجێکی راگەیاندندا هەواڵێکی "ناڕاست" بڵاوکراوەتەوە گوایە هێزەکانی پێشمەرگە دەستیان لە هێرشکردنە سەر بارەگایەکی حەشدی شەعبی لە پارێزگای سەلاحەدین هەبووە.
وەزارەتەکە "بە تووندی" ئەو دەنگۆیانە رەتدەکاتەوە و جەخت لەوە دەکاتەوە: "هێزی پێشمەرگە بەهیچ شێوەیەک بەشێک نییە لەو گرژی و ململانێ سەربازییانەی لە ناوچەکەدا هەن، پێشمەرگە بەشداریی هیچ جۆرە کردەیەکی سەربازیی دژ بە هیچ لایەنێک نەکردووە."
وەزارەتەکە ئاماژەی بەوە کردووە، ئەرکی سەرەکیی هێزەکانیان پاراستنی ئاسایش و سەقامگیرییە، هەروەها پابەندبوونی خۆیشیان بە هاوئاهەنگی و کاری هاوبەش لەگەڵ هێزە ئەمنییە عێراقییەکان دووپات کردووەتەوە.
.jpg&w=3840&q=75)