رووداو دیجیتاڵ
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، ئاگادارییەکی بەپەلەی بڵاوکردەوە و رایگەیاند کە لە ئەنجامی یەکگرتنی دوو نزمەپاڵەپەستۆی دەریای ناوەڕاست و دەریای سوور، لەگەڵ بارستە هەوایەکی سارد، شەپۆلێکی بارانبارینی سەرتاسەری و بەهێز هەرێمی کوردستان دەگرێتەوە.
وردەکاریی شەپۆلەکە بەپێی کات:
شەوی پێنجشەممە
لە کاتەکانی درەنگانی شەودا، بارانبارین دەست پێ دەکات و بەرەو نیوەشەو دەگۆڕێت بۆ لێزمەباران و هەورەبروسکە. ئەم شەپۆلە سەرەتا ناوچەکانی هەولێر، کەرکووک، گەرمیان، سلێمانی و ڕاپەڕین دەگرێتەوە. لە دوای نیوەشەویشەوە لێزمەبارانەکە پارێزگای دهۆک و ئیدارەی زاخۆ دەگرێتەوە.
رۆژی هەینی
بارانی لێزمە لەسەر پارێزگای دهۆک و ناوچە شاخاوییەکان بەردەوام دەبێت. لە ناوچەکانی تری هەرێم باران بە شێوەی پچڕپچڕ دەبێت، بەڵام لە شەودا جارێکی تر لێزمەباران سلێمانی و هەڵەبجە دەگرێتەوە، لەگەڵ بارینی بەفر لە لووتکەی شاخە بەرزەکاندا.
بڕی بارانی پێشبینیکراو (بە ملیمەتر):
هەولێر: 35 – 45 ملم
سلێمانی: 38 – 42 ملم
دهۆک: 25 – 30 ملم
کەرکووک: 24 – 28 ملم
هەڵەبجە: 38 – 44 ملم
گەرمیان: 36 – 42 ملم
کەشناسی هەرێمی کوردستان چەند رێنماییەکی بۆ خۆپاراستن لە لافاو بڵاوکردووەتەوە:
مەترسیی لافاو: ئەگەری بەرزبوونەوەی ئاستی ئاو و دروستبوونی لافاوی لەناکاو لە دۆڵ و ناوچە نزمەکان هەیە.
باوزەق: خێرایی با زیاد دەکات و لە هەندێک کاتدا دەگاتە سەروو 50 کم.
هەورەبروسکەی بەهێز: داوا لە هاووڵاتییان دەکرێت لە کاتی هەورەبروسکەدا لە ناوچە شاخاوییەکان و شوێنە کراوەکان دوور بکەونەوە و دەشڵێت، پلەی گەرما بۆ 2-3 پلە نزمدەبنەوە.
.jpg&w=3840&q=75)
