رووداو دیجیتاڵ
وەزارەتی خوێندنی باڵا و توێژینەوەی زانستیی هەرێمی کوردستان، داوا لە وەزارەتی گواستنەوە و گەیاندن دەکات کۆمپانیاکانی ئینتەرنێت ئاگادار بکەنەوە بۆ دابینکردنی ئۆفەری تایبەت بۆ قوتابیان و مامۆستایان، ئەمەش وەک ئاسانکارییەک بۆ سەرکەوتنی پرۆسەی خوێندنی ئۆنلاین.
بەپێی نووسراوێکی فەرمی کە واژۆی ئارام محەممەد، وەزیری خوێندنی باڵا و توێژینەوەی زانستی لەسەرە و رۆژی 30ی ئادار دەرچووە، داوا لە وەزارەتی گواستنەوە کراوە لە رێگەی کۆمپانیاکانی گەیاندن و ئینتەرنێتەوە هاوکاری وەزارەتی خوێندنی باڵا بن.
لە نووسراوەکەدا هاتووە، "بە مەبەستی پاراستنی گیانی خوێندکاران و قوتابیان و مامۆستایان و فەرمانبەران، پرۆسەی خوێندن کراوە بە ئۆنلاین و دیجیتاڵی،" هەر بۆیە داوا دەکەن کۆمپانیاکان ئاگادار بکرێنەوە تاوەکو "ئۆفەری تایبەتی ئینتەرنێت بۆ خوێندکاران و قوتابیان و مامۆستایان دابین بکەن."
وەزیری خوێندنی باڵا جەخت لەوە دەکاتەوە کە پێویستە ئەو ئۆفەرانەی پێشکەش دەکرێن، لە رووی "نرخ و کوالێتییەوە" گونجاو بن و ببنە مایەی هاوکاری بۆ بەردەوامیی پرۆسەی خوێندن لە هەرێمی کوردستان.
ئەم داواکارییە دوای ئەوە دێت کە رۆژی یەکشەممە، 29-03-2026، حکومەتی هەرێمی کوردستان بڕیاری دا خوێندنی ئامادەبوون لە نێو پۆل رابگیرێ و پڕۆسەکە تەنیا بە شێوازی ئۆنلاین و دیجیتاڵی بەردەوام بێت.
.jpg&w=3840&q=75)
