پارێزەرەکەی: لاهوور شێخ جەنگی لە شوێنی خۆیەتی

قادر ئاغا مەنتک، یەکێک لە پارێزەرانی دەستگیرکراوانی لالەزار، رۆژی پێنجشەممە، 2ـی نیسانی 2026، بە تۆڕی میدیایی رووداوی گوت: "کاک لاهوور و کاک پۆڵادی برای هەر لە زیندانی ئاسایشی گشتیی سلێمانی دان و نەبراون بۆ شوێنی دیکە".

بەگوێرەی زانیارییەکانی رووداو، ئەو شوێنەی لاهوور شێخ جەنگی تێدا بەند کراوە، یەکێکە لە "پارێزراوترین و تۆکمەترین ژوورەکانی ئاسایش".

شەوی 22ـی ئابی 2025، هێزە ئەمنییەکانی سلێمانی، کە پێکهاتبوون لە هێزەکانی دژە تیرۆر، ئاسایش و کۆماندۆ، دوای ئەوەی لاهوور شێخ جەنگی رازی نەبوو خۆی رادەست بکات، هێرشیان کردە سەر هۆتێل لالەزار، دوای سێ کاژێر رووبەڕووبوونەوە، لاهوور شێخ جەنگی و پۆڵادی برای و ئەندامانی هێزەکەی لاهوور شێخ جەنگی دەستگیرکران.

رۆژی 12-1-2026، بۆ یەکەم جار لاهوور شێخ جەنگی برایە بەردەم دادوەر لە دادگەی سلێمانی، بەڵام دادوەر بڕیاری کۆتایی لە دۆسیەکەی نەدا و رایگەیاند، بۆ وردبینی دۆسیەکە رەوانەی دادگەی تێهەڵچوونەوەی هەرێمی کوردستان لە هەولێر دەکرێت.

تاوەکو ئەمڕۆ ژمارەیەک لە دەستگیرکراوانی لالەزار لە کاتی جیاوازدا ئازاد کراون. لەوانە 7 کەس لە  3ـی مانگی شوباتـی ئەم ساڵ ئازاد کران، پێش ئەوان لە 16-01-2026 چوار کەس و 13ـی هەمان مانگ 17 کەسی دیکە ئازاد کرابوون.