رووداو دیجیتاڵ
شاندی سەرۆکایەتیی هەرێمی کوردستان بۆ یەکەمین کۆبوونەوە چووە ڤاتیکان. نێچیرڤان بارزانی، سەرۆکی هەرێمی کوردستان لەگەڵ پاپای ڤاتیکان بە دووقۆڵی کۆبووەوە.
دوای کۆبوونەوەکە و ئاڵوگۆڕی دیارییەکان، سەرۆکی هەرێمی کوردستان لە پۆستێکدا لە تۆڕی کۆمەڵایەتیی ئێکس، خۆشحاڵیی خۆی بە دیداری قەداسەتی پاپا لیۆی چواردەیەم دەربڕی و بانگهێشتی کرد بۆ سەردانیکردنی کوردستان و عێراق.
رۆژی دووشەممە، 18ـی ئایاری 2026، دڵشاد شەهاب، گوتەبێژی سەرۆکایەتیی هەرێمی کوردستان لە لێدوانێکدا بۆ رۆژنامەڤانان باسی لە ناوەڕۆکی سەردانەکەی نێچیرڤان بارزانی کرد و رایگەیاند، لە کۆبوونەوەکەی ڤاتیکان لەگەڵ پاپای ڤاتیکان، سەرنج خرایە سەر پرسی پێکەوەژیان لە هەرێمی کوردستان. گوتیشی: "جەنابی سەرۆکی هەرێم دووبارەی کردەوە کە هەرێمی کوردستان بەردەوام دەبێت لە سیاسەتی فەراهەمکردنی ژیانێکی باش و دڵنیاییدان بە کریستیانەکانی کوردستان، کە ئەمە لای پاپای ڤاتیکان بایەخێکی زۆری هەیە."
دڵشاد شەهاب لە وەڵامی پرسیاری رووداودا سەبارەت بە رۆڵی ئیتاڵیا گوتی: "ئیتاڵیا لە چوارچێوەی هاوپەیمانیی نێودەوڵەتی هاوکاریی هەرێمی کوردستان دەکات. ئەوەی هەستمان پێکردووە پشتگیریی ئیتاڵیا بۆ هەرێمی کوردستانە."
گوتەبێژی سەرۆکایەتیی هەرێمی کوردستان باسی لە هەڕەشەکانی سەر هەرێمی کوردستان کرد و گوتی، سەرەڕای ئەوەی هەرێمی کوردستان هەوڵیداوە نەبێتە لایەن لە شەڕ و ئاڵۆزییەکاندا و نەبووە، بەڵام لەلایەن زۆر لایەن و بەتایبەتی "گرووپە لەیاسا دەرچووەکانەوە" بە ناحەق کراوەتە ئامانج و زەرەری گەورەی پێگەیشتووە.
گیدۆ کرۆسێتۆ، وەزیری بەرگریی ئیتاڵیا پێشوازییەکی گەرمی لە نێچیرڤان بارزانی کرد و لە کۆبوونەوەیەکدا چەندین مژاری پەیوەندیدار بە پەیوەندییە سەربازییەکان و هەماهەنگیی لەشکرییان تاوتوێ کرد.
رۆژی سێشەممە، 19ی ئایار، سەرۆکی هەرێمی کوردستان لەگەڵ سەرۆککۆماری ئیتاڵیا و وەزیری دەرەوەش کۆدەبێتەوە.
.jpg&w=3840&q=75)