رووداو دیجیتاڵ
دابەشکردنی بەشە خۆراکی مانگانە لە سلێمانی دەستی پێکردووە. بەڕێوەبەرایەتیی دابەشکردنی خۆراک دەڵێ، زیاتر لە دوو ملیۆن کەس ئەم مانگە بەشە خۆراک وەردەگرن.
رۆژی شەممە، 12ی ئەیلوولی 2026، کامەران فەتاح، بەڕێوەبەری دابەشکردنی خۆراکی سلێمانی بە رووداوی گوت: "ماوەی چوار رۆژە دابەشکردنی بەشە خۆراکی مانگانە دەستی پێکردووە و دوو ملیۆن هاونیشتمانی سنوورەکە بەشە خۆراک وەردەگرن".
سەبارەت بەو خۆراکانەی دابەش دەکرێن، کامەران فەتاح ئاماژەی بۆ ئەوەکرد، بەشە خۆراکی ئەم مانگە پێکهاتووە لە نیسک، نۆک، برنج، لەتکەنۆک، شەکر و دۆشاو؛ ئاماژەی بەوەشکرد "بۆ دابەشکردنی، 22 رۆژمان پێویستە".
بەڕێوەبەری دابەشکردنی خۆراکی سلێمانی گوتی: "هاونیشتمانییان هەر جۆرە خۆراکێکی خراپیان بەدی کرد، دەتوانن پەیوەندیمان پێوە بکەن و بە ئۆتۆمبێلی خۆمان دەچین بۆیان دەگۆڕین".
هاوکات هەر ئەمڕۆ دلێر عەبدولقادر، بەڕێوەبەری دابەشکردنی خۆراک لە هەولێر بە تۆڕی میدیایی رووداوی گووت: "دابەشکردنی سەبەتەی پێنجەمی خۆراک لە پارێزگای هەولێر دەستیپێکردووە و 18 رۆژمان پێویستە بۆ دابەشکردنی".
ئەو بەڕێوەبەرەی دابەشکردنی خۆراک گوتی، ئەو خۆراکانەی ئەم مانگە دابەش دەکرێن کواڵیتییان زۆر باشە، بەڵام "کێشەی برنج و دۆشاومان هەیە کە هێشتا نەگەیشتوون و لەگەڵ گەیشتنی دەست دەکەین بە دابەشکردنی".
