رووداو دیجیتاڵ
دەزگای ئاسایشی هەرێم دەڵێت، ئەمشەو لە قەزای خورماڵ لە پارێزگای هەڵەبجە "ئەمیرێکی شەرعی گرووپێکی داعشمان دەستگیرکرد".
لە راگەیێندراوێکدا، دەزگای ئاسایشی هەرێم ئاماژە بەوە دەکات، "بەڕێوەبەرایەتیی گشتی ئۆپەراسیۆنەکانی ئاسایش، لەئۆپراسیۆنێکدا دوای رووبەڕووبونەوەی چەکداری، کاژێر 23:20 خولەکی شەوی 12-9-2026 لە خورماڵ، توانییان ئەمیرێکی شەرعی داعش دەستگیربکەن".
دەشڵێت، "لە ماوەی (96) کاژێری رابردوودا، بەفەرمانی بەڕێز سەرۆکی دەزگای ئاسایشی هەرێم و بە بڕیاری بەڕێز دادوەری لێکۆڵێنەوەی ئاسایش، بە ماددەی (2)ی تیرۆر، لە چەند ئۆپەراسیۆنێکدا، بەڕێوەبەرایەتی گشتیی ئۆپەراسیۆنەکانی ئاسایش، بە هاوکاریی بەڕێوەبەرایەتیی ئاسایشی پارێزگای سلێمانی و هەڵەبجە، توانییان دوو مەفرەزەی چەکداریی داعش دەستگیربکەن و لەگەڵ ژمارەیەک ئەندامی نهێنی داعش کە کۆی گشتییان دەکاتە (22) کەس".
هەروەها باس لەوە دەکات کە دەستگیراوە بەسەر بڕێکی زۆری چەکی قورس و مامناوەند و بچووک و بۆمبی دەستی و دووربینی سەربازی و تەقەمەنی "کە بەنیاز بوون لە ناوەڕاستی مانگی 9دا چەند کردەیەکی تیرۆریستی ئەنجام بدەن".
دەزگای ئاسایشی هەرێم روونیدەکاتەوە، "ئێستا سەرجەمیان دەستگیرکراون و لێکۆڵینەوە لە دۆسیەکەدا بەردەوامە و سەرجەم بەڵگە و زانیارییەکان لە بەردەستی بەڕێوەبەرایەتیی گشتیی ئۆپەراسیۆنەکانی ئاسایش و بەڕێز دادوەری لێکۆڵینەوەدایە؛ لەکاتی دەستگیرکردنی ئەمیری شەرعی گرووپەکە، تەقە روویداوە، بەڵام توانرا ئەمیری شەرعی گرووپەکە دەستگیر بکەن و ئۆپەراسیۆنەکە بەبێ زیانی گیانی کۆتایی هاتووە".
"لە داهاتوویەکی نزیکدا، کۆی گشتی دانپێدانان و سەرجەم بەڵگەکان بۆ رایگشتی ئاشکرادەکەین و سەرجەم ئەندامانی گرووپە دەستگیرکراوەکە لە رەگەزی کوردن"، دەزگای ئاسایشی هەرێم وا دەڵێت.
