رووداو دیجیتاڵ
عومرەکارێکی کورد کە بۆ بەجێهێنانی سوننەتی عومرە لە شاری مەککەی سعودیە بوو، گیانی لە دەست دا.
کاروان ستوونی، گوتەبێژی حەج و عومرەی هەرێمی کوردستان، ئەمڕۆ سێشەممە 15ی ئەیلوولی 2026 بە تۆڕی میدیایی رووداوی راگەیاند: "ئەو هاونیشتمانییە شەوی رابردوو گیانی لەدەستداوە، ناوی محەممەد حەسەنە و خەڵکی قەزای کەلارە".
ئەو هاونیشتمانییە تەمەنی 65 ساڵە. کاروان ستوونی گوتی، کەسوکاری کۆچکردوو لە گەشتەکەدا لەگەڵیدان و بڕیارە تەرمەکەی بگەڕێندرێتەوە بۆ شاری کەلار و بەخاک بسپێردرێت.
ئەم ساڵ دوای رێوڕەسمەکانی حەج و دەستپێکردنەوەی عومرە، ئەوە دووەم هاونیشتمانیی هەرێمی کوردستانە لە سعودیە گیان لەدەست بدات.
بەگوێرەی ئاماری بەڕێوەبەرایەتیی حەج و عومرە، ساڵانە زیاتر لە 50 هەزار هاونیشتمانی بۆ بەجێهێنانی سونەتی عومرە دەچنە سعودیە.
