رووداو دیجیتاڵ
لە باخەکانی چیای شنروێ لە سنووری پارێزگای هەڵەبجە، هاونیشتمانییەکی خەڵکی رۆژهەڵاتی کوردستان لە کاتی گوێز تەکاندندا لە دار کەوتە خوارەوە و گیانی لەدەستدا.
رۆژی یەکشەممە، 20ـی ئەیلوولی 2026، ئاکام قوتبەدین، گوتەبێژی پۆلیسی هەڵەبجە بە تۆڕی میدیایی رووداوی راگەیاند: "هاونیشتمانییەکی رۆژهەڵاتی کوردستان بە ناوی فازڵ جیهانگیر، بۆ گوێزتەکاندن هاتبووە سنوورەکە و لە باخەکانی شنروێ سەرقاڵی گوێزتەکاندن بووە، بەڵام لەسەر دارەکەوە کەوتووەتە خوارەوە و گیانی لەدەستداوە".
گوتەبێژی پۆلیسی هەڵەبجە گوتی:" ئەو هاونیشتمانییە تەمەنی 38 ساڵە و خەڵکی شاری جوانڕۆی رۆژهەڵاتی کوردستانە، لە چیای شنروێ تووشی ئەو رووداوە بووە و ئێستاش تەرمەکەی لە دادپزیشکیی هەڵەبجەیە".
سەبارەت بە رادەستکردنەوەی تەرمەکە بە خێزانەکەی، ئاکام قوتبەدین دەڵێ: "دەبێت کەسوکاری رەزامەندیی فەرمیی هەردوو دیوی ئێران و هەرێمی کوردستان وەربگرن و بێن رێکارەکان تەواو بکەن، تاوەکو بتوانن تەرمەکەی ببەنەوە بۆ زێدی خۆی".
