لە سلێمانی و گەرمیان دوو کەس بە رووداوی هاتووچۆ گیانیان لەدەستدا

رووداو دیجیتاڵ

لە ئەنجامی دوو رووداوی هاتووچۆی جیاوازدا لە سنووری پارێزگای سلێمانی و ئیدارەی گەرمیان، دوو کەس گیانیان لەدەستدا و دوو کەسی دیکەش بریندار بوون.

رووداوی یەکەم پێشنیوەڕۆی ئەمڕۆ پێنجشەممە، 24ـی ئەیلوولی 2026، لەنێو شاری سلێمانی روویدا، کاتێک ئۆتۆمبێلێک لە هاووڵاتییەکی پیادەی دا. نەقیب ئاری لەتیف، گوتەبێژی پۆلیسی سلێمانی، بە تۆڕی میدیایی رووداوی راگەیاند: "قوربانییەکە پیاوێکی تەمەن 74 ساڵە، دەستبەجێ گیانی لەدەستداوە و کەسوکارەکەی ئاگادار کراونەتەوە، هاوکات شۆفێری ئۆتۆمبێلەکەش دەستبەسەر کراوە."

لەلایەکی دیکەوە، ئەمڕۆ گەنجێکی تەمەن 19 ساڵ لە نەخۆشخانە گیانی لەدەستدا، دوای ئەوەی شەوی رابردوو لە شاری کەلار بەهۆی پێکدادانی دوو ماتۆڕسکیلەوە بە سەختی بریندار ببوو.

عەمید سامان عەلی، گوتەبێژی هاتووچۆی گەرمیان، بە رووداوی گوت: "لە ئەنجامی پێکدادانی ئەو دوو ماتۆڕسکیلەدا لە کەلار، جگە لە گیانلەدەستدانی ئەو گەنجە، دوو کەسی دیکەش بریندار بوون و لەژێر چاودێریی پزیشکیدان."

بەپێی بەدواداچوونەکانی رووداو، تەنیا لەم مانگەدا زیاتر لە 15 هاونیشتمانی لە ناوچە جیاوازەکانی هەرێمی کوردستان بەهۆی رووداوەکانی هاتووچۆوە گیانیان لەدەستداوە.

بەگوێرەی ئامارە فەرمییەکانی وەزارەتی ناوخۆ، لە ساڵی 2018ـەوە تاوەکو مانگی ئابی 2025، لە هەرێمی کوردستاندا 21 هەزار و 646 رووداوی هاتووچۆ روویانداوە؛ بەهۆیانەوە 3 هەزار و 137 کەس گیانیان لەدەستداوە و 39 هەزار و 339 کەسی دیکەش بریندار بوون.