رووداو دیجیتاڵ
ژمارەیەکی دیکە لە رووفاتی ئەنفالکراوان کە 153 رووفاتن و لە بیابانەکانی سەماوە دۆزراونەتەوە، ئەمڕۆ شەممە 26ی ئەیلوولی 2026 دەگەڕێندرێنەوە هەرێمی کوردستان. بەڕێوەبەری شەهیدان و ئەنفالکراوانیش دەڵێ، دوای تەواوبوونی رێکارەکان بە خاک دەسپێردرێن.
ئەدیب لەتیف، بەڕێوەبەری شەهیدان و ئەنفالکراوانی سلێمانی بە رووداوی گوت، "رووفاتی 153 قوربانیی ئەنفال لە گۆڕێکی بە کۆمەڵ لە بیابەنەکانی سەماوە دۆزراونەتەوە و ئەمڕۆ شەممە دەگەڕێندرێنەوە سلێمانی."
بەڕێوەبەری شەهیدان و ئەنفالکراوانی سلێمانی ئاماژەی بەوەش کرد، رووفاتەکان زۆربەیان ژن و منداڵن، خەڵکی ناوچە جیاوازەکانی هەرێمی کوردستانن، دوای تەواوبوونی رێکارەکان بە خاک دەسپێردرێن.
دۆزینەوەی رووفاتەکان و هێنانەوەیان بە هاوبەشی دەزگای شەهیدانی هەرێمی کوردستان و پزیشکی دادی بەغدایە. ئەدیب لەتیف دەڵێت، "نموونەی خوێن لە رووفاتەکان وەرگیراوە و بەراورد دەکرێ بە خوێنی کەسوکاری ئەنفالکراوان، بەگوێرەی بەڵگە و رێکارەکان دەبرێنەوە شوێنی خۆیان و بە خاک دەسپێردرێن."
سەبارەت بەوەی قوربانییەکان دانیشتووی کام ناوچەی هەرێمی کوردستان بوون، بەڕێوەبەری شەهیدان و ئەنفالکراوانی سلێمانی گوتی، "تاوەکو ئێستا ئامارەکانمان بەدەست نەگەیشتووە. لەگەڵ گەیشتنی نموونەی خوێن و ئەو بەڵگانەی لەبەردەستن، شوێنی قوربانییەکان ئاشکرا دەکەین."
هێشتا ژمارەیەک گۆڕی بەکۆمەڵی قوربانییانی شاڵاوی ئەنفال لە بیابەنەکانی سەماوە هەڵنەدراوەتەوە. بە گوتەی وەزارەتی شەهیدان و ئەنفالکراوان، هۆکارەکەی دەگەڕێتەوە بۆ ئاڵۆزیی رێکارە یاساییەکان و سنوورداری ئەو تیمە تەکنیکییەکانەی بەرپرسن لە هەڵدانەوە گۆڕە بەکۆمەڵەکان.
