رووداو دیجیتاڵ
حکومەتی هەرێمی کوردستان لە چوارچێوەی بڕیارێکی ئەنجوومەنی وەزیرانی فیدراڵ، دوو رۆژ پشووی فەرمیی لە دامەزراوەکانیدا راگەیاند. فەرمانگەی میدیا و زانیاری بڵاویکردەوە کە رۆژانی چوارشەممە و پێنجشەممە (30ـی ئەیلوول و 1ـی تشرینی یەکەم) لە سەرجەم دامەزراوە فەرمییەکانی هەرێمی کوردستان پشووی فەرمی دەبێت.
پێشتر رۆژی شەممە، 26ـی ئەیلوولی 2026، نووسینگەی راگەیاندنی سەرۆکوەزیرانی عێراق بڵاویکردەوە کە ئەنجوومەنی وەزیران بڕیاریداوە لە 30ـی ئەیلوولەوە تاوەکو 3ـی تشرینی یەکەمی داهاتوو دەوامی فەرمی لە سەرجەم دامەزراوەکانی دەوڵەتدا رابگیرێت. ئەم بڕیارەش وەک رێزگرتنێکە بۆ ئەوەی بە "رۆژانی سەروەری"ـی کۆماری عێراق ناوی هێناوە. بەپێی بڕیارەکە، سەرجەم وەزارەت و فەرمانگەکانی حکومەتی فیدراڵ لەو چوار رۆژەدا پشوویان دەبێت.
دیاریکردنی ئەو ماوەیە وەک "رۆژانی سەروەری"، بەستراوەتەوە بە دوو رووداوی گرنگی سیاسی و مێژوویی عێراقەوە. یەکەمیان، رۆژی 30ـی ئەیلوول هاوکاتە لەگەڵ ئەو وادە فەرمییەی کە لە رێگەی دانوستانەکانی نێوان بەغدا و واشنتنەوە بۆ کۆتاییهاتنی ئەرکی سەربازیی هاوپەیمانیی نێودەوڵەتی و رادەستکردنی بنکە سەربازییەکان بە هێزە عێراقییەکان دیاریکراوە. حکومەتی عێراق ئەمە وەک وەرچەرخانێکی مێژوویی و هەنگاوی چەسپاندنی تەواوەتیی سەروەریی خاکی وڵات پێناسە دەکات.
لە لایەکی دیکەوە، رۆژی 3ـی تشرینی یەکەم لە ساڵنامەی فەرمیی عێراقدا بە "رۆژی نیشتمانی" هەژمار دەکرێت. ئەمەش یادکردنەوەی ساڵیادی کۆتاییهاتنی داگیرکاریی بەریتانیا، راگەیاندنی سەربەخۆیی عێراق و پەیوەستبوونی وڵاتەکەیە بە "کۆمەڵەی گەلان"ـەوە لە ساڵی 1932دا.
