رووداو دیجیتاڵ
هەفتەی داهاتوو فێستیڤاڵی ترێ و هەنگوین لە دهۆک بۆ ماوەی سێ رۆژ بەڕێوەدەچێت و 80 جووتیار بەرهەمەکانیان نمایش دەکەن. بەڕێوەبەری گشتیی کشتوکاڵی دهۆکیش رایدەگەیێنێت، ئەم ساڵ بەرهەمی هەنگوین سێ هێندە و ترێش 20 هەزار تۆن زیادی کردووە.
رۆژی دووشەممە، 28ـی ئەیلوولی 2026، ئەحمەد جەمیل، بەڕێوەبەری گشتیی کشتوکاڵی دهۆک بە تۆڕی میدیایی رووداوی راگەیاند: "لە رۆژانی 3، 4 و 5ـی تشرینی یەکەم بۆ ماوەی سێ رۆژ فێستیڤاڵی ترێ و هەنگوین لە دهۆک بەڕێوەدەچێت. فێستیڤاڵەکە رۆژانە لە کاژێر 11:00ـی بەیانییەوە دەستپێدەکات تاوەکو درەنگی شەو بەردەوام دەبێت، هاوکات 80 کەپر بۆ 80 جووتیار ئامادە کراون کە سەرجەم بەرهەمە خۆماڵییەکانی ناوچەکەی تێدا نمایش دەکرێت و بە پلەی یەکەمیش ترێ و هەنگوینە."
بەڕێوەبەری گشتیی کشتوکاڵی دهۆک گوتی: "ئەم ساڵ 80 هەزار تۆن ترێمان هەبووە، لە کاتێکدا پار 60 هەزار تۆن بوو. هەروەها 300 تۆن هەنگوینمان هەیە، پار 100 تۆن بوو، واتە بەرهەمی هەنگوین بووەتە سێ ئەوەندە، ئەمەش کەرتی کشتوکاڵی ناوچەکە دەبووژێنێتەوە."
ئەحمەد جەمیل هۆکاری زیادبوونی بەرهەمەکانی بۆ "بارانبارینی باش و درێژەی وەرزی بەهاری ئەم ساڵ" گەڕاندەوە.
لەبارەی ئامادەکارییەکان و ژمارەی سەردانیکاران، بەڕێوەبەری گشتیی کشتوکاڵی دهۆک گوتی: "پار 35 هەزار گەشتیار لە ماوەی دوو رۆژدا سەردانی فێستیڤاڵەکەیان کردبوو، لە کاتێکدا 40 کەپر ئامادە کرابوو، بۆیە بۆ ئەم ساڵ پێشبینی دەکەین ژمارەی گەشتیاران و سەردانیکاران زۆر زیاتر بێت."
زۆرترین بەرهەمی ترێ لە هەرێمی کوردستان لە پارێزگای دهۆکە. بەڕێوەبەری کشتوکاڵی سنوورەکە دەڵێت: "هەموو ناوچەکەمان ترێی باشیان هەیە، بەڵام بەنێوبانگترینیان ترێی مانگێش و زاوێتەیە".
بەپێی ئاماری بەڕێوەبەرایەتیی باخداریی دهۆک، زیاتر لە 39 هەزار دۆنم زەوی لە سنووری پارێزگای دهۆک بە دار مێو داچێنراوە.
