رووداو - دیجیتاڵ
بەڕێوەبەرایەتیی رەگەزنامە و زانیاریی شارستانیی هەولێر کارئاسانی بۆ ئەو هاونیشتمانییانە دەکات کە لە کاتی لافاوەکەی هەولێردا کارتی نیشتمانییان لەدەستداوە و دەڵێ، بەبێ نۆرەگرتن و بە زووترین کات کارتەکانیان بۆ دەردەهێندرێتەوە.
رۆژی سێشەممە، 10ـی تشرینی دووەمی 2026، عەقید یاسین عومەر عەبدوڵڵا، بەرپرسی بەشی کارتی نیشتمانی لە بەڕێوەبەرایەتیی رەگەزنامە و زانیاریی شارستانیی هەولێر بە تۆڕی میدیایی رووداوی راگەیاند، سەرجەم ئەو هاونیشتمانییانەی بەهۆی لافاوەکەوە کارتی نیشتمانییان لەدەستداوە، دەتوانن سەردانی بەڕێوەبەرایەتییەکەیان بکەن.
ئەو بەرپرسە ئاماژەی بەوە کرد کە "ئەو هاونیشتمانییانە بەبێ نۆرەگرتن و بە رێکاری ئاسانکراو مامەڵەکانیان بۆ جێبەجێ دەکرێ تاوەکو بە زووترین کات ببنەوە خاوەنی کارتی نیشتمانی."
بەهۆی بارانبارینەوە، شەممە 07-11-2026 لە شاری هەولێر لافاو دروست بوو، لە ئەنجامدا دوو کەس گیانیان لەدەستدا و ژمارەیەکی زۆر ئۆتۆمبێل و ماڵی هاونیشتمانییانیش زیانیان بەرکەوت.
