رووداو - دیجیتاڵ
میدیا نافەرمییەکانی سەر بە سوپای پاسدارانی ئێران، ناو و وێنەی پێنج ئەندامی سوپاکەیان بڵاوکردەوە، کە لە هێرشە هاوبەشەکەی سعودیە و ئەمریکا بۆ سەر بارەگاکانی حەشدی شەعبی لە پارێزگاکانی عێراق کوژراون.
کەناڵەکانی وەکو (خبر سپاە پاسداران) و (سپاە سایبری پاسداران) لە تەلەگرام بڵاویان کردەوە، پێنج ئەندامی سوپای پاسداران لەو هێرشانەدا کوژراون. دوو لە چەکدارەکان پلەدارن، یەکێکیان عەقیدە و ئەوەی دیکەشیان نەقیبە.
بەگوێرەی میدیای نزیک لە پاسداران، چوار ئەندامی پاسداران، کە خەڵکی شاری کاشانن، بە ناوەکانی عەلی ئەسغەر ئاستانە، ئەبولفەزل موتەقی، مورتەزا ئەکبەری و ئەمیر عەباس لە هێرشەکەدا کوژراون. چەکداری پێنجەمیش ناوی محەممەد ئەمین رۆستەمی جەلیلیان.
دوو سەرچاوەی حەشدی شەعبی بە ئاژانسی فڕانس پرێسیان راگەیاند، لە ئەنجامی هێرشە هاوبەشەکانی ئەمریکا و سعودیە بۆ سەر بارەگاکانیان لە عێراق، پێنج "راوێژکاری سەربازیی ئێرانی" کوژراون.
لەلایەکی دیکەوە گرووپەکانی سەر بە حەشدی شەعبی لە کەناڵەکانیان لە تەلەگرام بڵاویان کردەوە، بەشێک لە بریندارانی هێرشە هاوبەشەکەی سعودیە و ئەمریکا "بۆ چارەسەر" گواستراونەتەوە ئێران.
بەیانیی رۆژی چوارشەممە، 29ـی تەممووزی 2026، فڕۆکە جەنگییەکانی ئەمریکا و سعودیە چەندین بارەگای حەشدی شەعبییان لە هەشت پارێزگای عێراق بۆردوومان کرد. بەگوێرەی دەستەی حەشدی شەعبی، لە ئەنجامی هێرشەکاندا لانیکەم 20 کەس کوژران و 32ـی دیکەش بریندار بوون.
هێرشەکەی سعودیە و ئەمریکا بۆ سەر ئەو گرووپانە دوای ئەوە هات کە رۆژێک پێشتر سعودیە ئەو گرووپە چەکدارانەی بەوە تۆمەتبار کردبوو، کە هێرشیان کردووەتە سەر ژمارەیەک کێڵگەی نەوت لە رۆژهەڵاتی سعودیە.
شەوی رابردوو، فەرماندەی ناوەندی سوپای ئەمریکا (سێنتکۆم) بڵاویکردەوە، ئێران بە ژمارەیەک مووشەکی بالیستی هێرشی کردووەتە سەر بنکەیەکیان لە ئوردن. سەرۆکی ئەمریکا گوتی، "زۆر بە تووندی وەڵامی هێرشەکەی ئێران بۆ سەر بنکەکانمان دەدەینەوە"؛ ئاماژەی بەوەش کرد، ئەگەر دانوستاندنەکان شکست بهێنن ئەوا لە کاژێرێکدا تەواوی پردەکانیان لەنێودەبەن.
ئەمڕۆ چوارشەممە، سەرۆکی ئەمریکا بە میدیای وڵاتەکەی راگەیاند، هێرشەکەی بەیانیی رۆژی چوارشەممەی ئەمریکا و ئیسرائیل بۆ سەر گرووپە چەکدارەکان لە عێراق کە نزیکن لە ئێران، بە هاوئاهەنگی بووە لەگەڵ بەغدا.
