رووداو دیجیتاڵ
جێگری سەرۆککۆمای ئێران رایگەیاند، سەرکۆنەی ئەو هێرشە درۆنییە دەکات، کە کرایە سەر نووسینگەی مەسرور بارزانی و رایگەیاند، رێگە نادەن هیچ هێرش و پیلانێک پەیوەندی ئێران و هەرێمی کوردستان تێک بدات.
دووشەممە، 17ی ئابی 2026، عەبدولکەریم حوسێن زادە، جێگری سەرۆککۆماری ئێران لە تۆڕی کۆمەلایەتی ئێکس رایگەیاند: "وەکو کوردێکی ئێرانی و ئەندامی حکومەتی ئێران هێرش بۆ سەر نووسینگەی برام کاک مەسرور بارزانی، سەرۆک وەزیرانی هەرێمی کوردستان بە تووندی سەرکۆنە دەکەم."
عەبدولکەریم حوسێن زادە دەڵێت: "ئێمە تەنیا دراوسێ نین بەڵکو یەکین، رێگەی نادەین هیچ هێرش و پیلانێک درز بخاتە نێوان ئێران و هەرێمی کوردستان و دەبێت راستی ئاشکرا بێت و ئەنجامدەرانی رووبەڕووی لێپرسینەوە بکرێنەوە."
بەگوێرەی دژەتیرۆری کوردستان، کاژێر 00:28ی بەرەبەیانی دووشەممە 17-8-2026 دوو درۆنی بۆمبڕێژکراو لە جۆری (حەدید-110) لە دیوی سنووری وڵاتی ئێرانەوە ئاراستەی بارەگای نووسینگەی تایبەتیی سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمامی پارێزگای هەولێر کران.
دژەتیرۆری کوردستان هەروەها رایگەیاند کە هێرشەکە هیچ زیانێکی گیانیی لێ نەکەوتووەتەوە.
