رووداو دیجیتاڵ
رێکخراوەکانی مافی مرۆڤ رۆژی دووشەممە 31-08-2026، رایانگەیاند، کە دادگەکانی ئێران سزای لەسێدارەدانیان بۆ دوو ژن دەرکردووە کە بەهۆی بەشدارییان لە خۆپێشاندانەکانی مانگی کانوونی دووەمی رابردوو دەستگیرکرابوون؛ ئەمەش لە کاتێکدایە تاران پرۆسەی لەسێدارەدانی ئەو کەسانەی لەو خۆپێشاندانانەدا گیراون، خێراتر کردووە.
هەردوو ژنەکە لە دوو دۆسیەی جیاوازدا سزادراون، بەڵام هەردوو رووداوەکە پەیوەندییان بە شاری ئەسفەهانەوە هەبووە، کە ناوەندێکی سەرەکیی خۆپێشاندانە سەرتاسەرییەکانی شەوی 8 و 9ـی کانوونی دووەمی رابردوو بوو.
لە ژێر سایەی جەنگی ئێران و ئەمریکادا، تاران تاوەکو ئێستا 29 پیاوی بە تۆمەتی پەیوەندیدار بە خۆپێشاندانەکان لەسێدارەداوە. بەپێی ئامارەکانی رێکخراوی مافی مرۆڤی ئێران، تاوەکو ئێستا هیچ ژنێک بەهۆی ئەو ئاڵۆزییانەوە لەسێدارەنەدراوە، هەرچەندە لەم ساڵدا لانیکەم 16 ژنی دیکە بە تۆمەتی جیاواز لەسێدارە دراون.
دۆسیەی تەرانە رەحیمی و خوشکەکەی
رێکخراوی هەنگاو بۆ مافەکانی مرۆڤ و ئاژانسی هرانا رایانگەیاند، کە تەرانە رەحیمی تەمەن 20 ساڵان، لەگەڵ 9 پیاوی دیکە بە تۆمەتی رووداوەکانی کاتی خۆپێشاندانەکان لە یەکێک لە مەیدانەکانی ئەسفەهان، کە تێیدا دوو کەس کوژرابوون (یەکێکیان ئەندامی هێزە ئەمنییەکان بووە)، سزای لە سێدارەی بۆ دەرچووە.
هەروەها رۆمینای خوشکی تەرانە و چەند تۆمەتبارێکی دیکە لە هەمان دۆسیەدا، سزای تاوەکو 36 ساڵ زیندانییان بەسەردا سەپێندراوە.
ئاژانسی هرانا ئاماژەی بەوە کردووە، پارێزەرانی تۆمەتبارەکان نەیانتوانیوە دەستیان بە بەشێکی زۆری دۆسیەکە بگات و رەخنەیان هەبووە لەوەی کاتی پێویستیان پێنەدراوە بۆ پێداچوونەوە بە بەڵگەکاندا.
لەیلا ئەبولحەسەنی؛ تۆمەتی "موحارەبە"
لە دۆسیەیەکی دیکەدا، دادگەیەکی ئەسفەهان سزای لەسێدارەدانی بۆ لەیلا ئەبولحەسەنی تەمەن 43 ساڵان دەرکرد؛ لەیلا کە دایکی دوو منداڵە، بە تۆمەتی ئاگرتێبەردانی فرۆشگەیەک لە کاتی خۆپێشاندانەکاندا تاوانبار کراوە.
کەسوکارەکەی ئەو تۆمەتە رەتدەکەنەوە و دەڵێن لەیلا تەنیا لە شوێنی رووداوەکە ئامادە بووە و خەریکی گرتنی ڤیدیۆی ئاگرەکە بووە. بەڵام دادگە بە تۆمەتی "موحارەبە" (دژایەتیکردنی خودا) سزای داوە و ئێستا دۆسیەکە بۆ پێداچوونەوە رەوانەی دادگەی باڵا کراوە.
کاردانەوەی نێودەوڵەتی و لێکەوتەکان
پێشتر و لە مانگی نیسانی رابردوودا، دۆناڵد ترەمپ، سەرۆکی ئەمریکا، لە هەژماری خۆی لە پلاتفۆرمی ترووس سۆشیال پۆستێکی بڵاوکردەوە و تێیدا داوای ئازادکردنی 8 ژنی ئێرانی کردبوو کە گوایە مەترسیی لەسێدارەدانیان لەسەرە. هەرچەندە دواتر دەرکەوت هەموو ئەو ژنانە سزای سێدارەیان بۆ دەرنەچووە و هەندێکیان ئازادکراون.
یەکێکی دیکە لەو ژنانەی کە پێشتر سزای سێدارەی بۆ دەرچووبوو، بێتا هیممەتی بوو، کە تۆمەتبار کرابوو بە فڕێدانی بلۆکی کۆنکرێتی لەسەر باڵەخانەیەکەوە بۆ سەر هێزەکانی پۆلیس، بەڵام ئاژانسی هرانا لە مانگی نیساندا رایگەیاند کە سزای لەسێدارەدانەکەی هەڵوەشێندراوەتەوە.
ئێستا چاوی رێکخراوەکانی مافی مرۆڤ لەسەر بڕیارە نوێیەکانی دادگەی باڵای ئێرانە سەبارەت بەم دوو ژنە سزادراوەی ئیسفەهان.
