رووداو دیجیتاڵ
ناوەندی ئاماری ئێران دەڵێت، ساڵی خوێندنی 2022 - 2023 نزیکەی 930 هەزار قوتابی لە رۆژهەڵاتی کوردستان و ئێران وازیان لە خوێندن هێناوە. شارەزایانی پەروەردە، هەژاری بە هۆکارێکی سەرەکی دادەنێن.
بەگوێرەی ئامارەکە، ساڵی رابردوو 929 هەزار و 798 قوتابی، کە تەمەنیان لەنێوان 15 بۆ 17 ساڵ بووە، وازیان لە خوێندن هێناوە.
ژمارەی کەسانی 15 تاوەکو 17 ساڵ لە رۆژهەڵاتی کوردستان و ئێران سێ ملیۆن و 552 هەزار و 889 کەسە. لەو ژمارەیە 556 هەزار و 994 کەسیان وازیان لە خوێندن هێناوە.
ناوەندی مامۆستایانی ئێران و کۆمەڵەی رۆشنبیرانی ئێران دەڵێت، ژمارەیەک هۆکار هەن کە وا دەکەن قوتابیان بەو ژمارە زۆرە واز لە خوێندن بهێنن، سەرەکیترینیان هەژارییە.
وەزارەتی کاری ئێران دەڵێت، لە 85 ملیۆن دانیشتووی ئەو وڵاتە، 9 ملیۆن و 900 هەزار کەس لەژێر هێڵی هەژاریدا دەژین، بەڵام نوێنەری ئەنجوومەنە کرێکارییەکان لە ئەنجوومەنی باڵای کاری ئێران دەڵێت، 30%ی خەڵک لەژێر هێڵی هەژاریدان و توانای دابینکردنی پێداویستییەکانیان نییە.
