رووداو دیجیتاڵ
لە بنکەیەکی پۆلیسی شاری مەشهەدی ئێران تەقینەوەیەک روویدا بەهۆیەوە دوو پۆلیس کوژران، ناوەندی راگەیاندنی پۆلیسی خوڕاسان دەڵێت، رووداوەکە بەهۆی تەقینەوەی بڕێکی زۆر یاریی ئاگرین بووە، کە پێشتر دەستی بەسەردا گیرابوو.
رۆژی یەکشەممە، 30-03-2025، لەنێو بنکەیەکی پۆلیسی شاری مەشهەدی سەر بە پارێزگای خوڕاسانی رەزەویی ئێران، تەقینەوەیەک روویدا کە بەهۆیەوە سێ لە ئەندامانی پۆلیس و کەسێکی مەدەنی بە سەختی بریندار بوون.
هەر چوار بریندارەکە گەیێندرانە نەخۆشخانە، بەڵام ناوەندی راگەیاندنی پۆلیسی خوڕاسانی رەزەوی لە راگەیێندراوێکدا پشتڕاستی کردەوە کە دوو لە ئەندامانی پۆلیسی سەر بە بنکەکە بەهۆی سەختیی برینەکەیانەوە گیانیان لەدەستداوە.
بە گوێرەی راگەیێندراوەکە، رووداوەکە بەهۆی تەقینەوەی ئەو یارییە ئاگرینانە روویداوە، کە تیمەکانی پۆلیس لە رۆژانی جەژنی نەورۆز و چوارشەممە سووریدا، دەستیان بەسەردا گرتوون و لە بنکەکە راگیرابوون.
پۆلیسی شارەکە یان بەرپرسانی حکومی زانیاریی زیاتریان لەسەر رووداوەکە نەخستووەتەڕوو. لە راگەیێندراوەکەی پۆلیسی خوڕاسانی رەزەویدا ئەوەش هاتووە کە لێکۆڵینەوە لە رووداوەکە دەستیپێکردووە.
جەعفەر میعادفەر، بەرپرسی فریاکەوتنی خێرای ئێران رۆژی چوارشەممە 13-3-2024 رایگەیاند، لە رووداوەکانی پەیوەندیدار بە چوارشەممە سووری لەو وڵاتەدا، 14 کەس گیانیان لەدەستداوە و سێ هەزار و 253 کەسیش بریندار بوون.
