رووداو دیجیتاڵ
دوای دەستپێکردنی شەڕی نێوان ئەمریکا و ئیسرائیل لەگەڵ ئێران، هەزاران گەشتی ئاسمانی لە سەرانسەری جیهان هەڵوەشاونەتەوە. ئەمە بە گەورەترین پەککەوتنی گەشتە ئاسمانییەکان لە دوای سەردەمی کۆرۆناوە دادەنرێت.
چ وڵاتێک ئاسمانی خۆی داخستووە؟
دوای ئەوەی ئێران مووشەکی ئاراستەی چەند وڵاتێکی کەنداو کرد؛ ئێران، عێراق، ئیسرائیل، سووریا، کوێت و ئیمارات ئاسمانی خۆیان بە تەواوی یان بەشێکی داخست.
هەروەها ئوردن رایگەیاند، هێزە ئاسمانییەکانی خەریکی مەشقن بۆ پاراستنی ئاسمانی وڵاتەکەیان.
زیانەکان بە ژمارە:
• تەنیا رۆژی شەممە، نزیکەی هەزار گەشت کە بڕیاربوو لە وڵاتانی رۆژهەڵاتی نێوەڕاست بنیشنەوە، هەڵوەشاونەتەوە.
• لەسەر ئاستی جیهان، زیاتر لە 19 هەزار گەشت دواکەوتوون و 2 هەزار و 600 گەشتیش بە تەواوی هەڵوەشاونەتەوە.
دۆخی کۆمپانیاکانی فڕۆکەوانی:
• کۆمپانیاکانی ناوچەکە: هێڵە ئاسمانییەکانی ئیمارات، ئیتیحاد و قەتەر زۆربەی گەشتەکانیان راگرتووە. میسر و سووریاش گەشتەکانیان بۆ شارە گەورەکانی ناوچەکە وەستاندووە.
• کۆمپانیا ئەورووپییەکان:
- هێڵە ئاسمانییەکانی تورکیا(Turkish Airlines) گەشتەکانی بۆ عێراق، ئێران، سووریا و لوبنان راگرتووە.
- کۆمپانیای لوفتهانزای ئەڵمانی گەشتەکانی بۆ هەولێر، تاران، تەلئەڤیڤ، عەممان و بەیرووت تاوەکو 7ی ئادار راگرتووە.
- فەرەنسا و بەریتانیا و سویسراش زۆربەی گەشتەکانیان بۆ ناوچەکە هەڵوەشاندوونەتەوە.
• کۆمپانیاکانی ئەمریکا و کەنەدا: کۆمپانیاکانی وەک دێلتا، یونایتد و ئێیەر کەنەدا هەموو گەشتەکانیان بۆ ئیسرائیل و دووبەی و دەوحە راگرتووە.
• کۆمپانیاکانی ئاسیا و ئەفریقا: هێڵە ئاسمانییەکانی هیندستان، پاکستان، هۆنگ کۆنگ، ئیندۆنیزیا و ئەسیوپیا گەشتەکانیان بۆ وڵاتانی کەنداو و رۆژهەڵاتی نێوەڕاست وەستاندووە.
ئەم دۆخە بووەتەهۆی ئەوەی هەزاران گەشتیار لە فڕۆکەخانەکاندا گیربخۆن و چاوەڕێی ئاساییبوونەوەی دۆخەکە بن.
.jpg&w=3840&q=75)
