رووداو دیجیتاڵ
بەگوێرەی ئامارە فەرمییەکانی وڵاتانی ناوچەکە، لە ماوەی تەنیا دوو رۆژدا، ئێران بە 1311 مووشەکی بالیستی، کروز و درۆن هێرشی کردووەتە سەر چەند وڵاتێکی عەرەبی؛ هەرچەندە تاران دەڵێت ئامانجیان بنکەکانی ئەمریکایە، بەڵام زیانی زۆر بە فڕۆکەخانە، بەندەر و ناوچەکانی نیشتەجێبوون گەیشتووە.
ئەم هێرشانە کە لە رۆژی شەممە، 28ـی شوباتەوە دەستیان پێکردووە، وەک وەڵامێکە لەلایەن تارانەوە بۆ ئەو هێرشە بەرفراوانەی ئەمریکا و ئیسرائیل کە تێیدا چەندین بەرپرسی باڵای ئێران کوژران. بەگوێرەی داتاکان، ئیمارات زۆرترین هێرشی کراوەتە سەر و دوای ئەویش کوێت و بەحرەین دێن.
وردەکاریی هێرشەکان بەگوێرەی وڵاتان:
ئیمارات؛ 708 مووشەک و درۆن
وەزارەتی بەرگریی ئیمارات رایگەیاند، 167 مووشەک (165 بالیستی و دوو کروز) و 541 درۆنی ئێرانی ئاراستەی خاکی وڵاتەکەیان کراون. سیستمی بەرگریی ئیمارات توانیویەتی زۆربەیان تێکبشکێنێت، بەڵام 35 درۆن لەنێو خاکی وڵاتەکە کەوتوونەتە خوارەوە و زیانی ماددییان لێکەوتووەتەوە.
کوێت؛ 380 مووشەک و درۆن
سوپای کوێت ئاشکرای کرد، 97 مووشەک و 283 درۆن لە ئێرانەوە ئاراستەی وڵاتەکەیان کراون. بەهۆی تێکشکاندنیان لە ئاسماندا، پاشماوەی مووشەکەکان لە چەند ناوچەیەکی جیاواز کەوتوونەتە خوارەوە و زیانی ماددییان بە هەندێک دامەزراوە گەیاندووە.
بەحرەین؛ 95 مووشەک و درۆن
سوپای بەحرەین رایگەیاند، سیستمی بەرگریی ئاسمانیی وڵاتەکەیان رووبەڕووی 61 مووشەک و 34 درۆن بووەتەوە و بە سەرکەوتوویی تێکی شکاندوون.
قەتەر؛ 77 مووشەک و درۆن
وەزارەتی بەرگریی قەتەر رایگەیاند، 65 مووشەکی بالیستی و 12 درۆن ئاراستەی وڵاتەکەیان کراون. بەهۆی چڕیی هێرشەکان، دوو مووشەک گەیشتوونەتە بنکەی "عودەید" و درۆنێکیش رادارێکی ئاگادارکردنەوەی پێشوەختەی پێکاوە، بەڵام زیانی گیانییان نەبووە.
ئوردن و عومان
سوپای ئوردن رووبەڕووی 49 درۆن و مووشەکی بالیستی بووەتەوە کە ئاراستەی شانشینەکە کرابوون. لە عومانیش، بەندەری بازرگانیی "دوقم" بە دوو درۆن کرایە ئامانج.
سعودیە؛ هێرشی بەرفراوان
وەزارەتی دەرەوەی سعودیە سەرکۆنەی هێرشەکانی ئێرانی بۆ سەر ناوچەی ریاز و ناوچەی رۆژهەڵات کرد، بەبێ ئەوەی ژمارەی وردی مووشەک و درۆنەکان ئاشکرا بکات، جەختی لەوە کردەوە کە هێزەکانیان رووبەڕووی هێرشەکان بوونەتەوە.
ئەم پەرەسەندنە نائاساییە لە کاتێکدایە، ئەنجوومەنی هاریکاریی کەنداو داوای لە ئەنجوومەنی ئاسایشی نێودەوڵەتی کردووە دەستبەجێ بێتە دەنگ بۆ راگرتنی ئەو پێشێلکارییانەی ئێران کە ئاسایشی ناوچەکەی خستووەتە مەترسییەکی گەورەوە.
.jpg&w=3840&q=75)
