رووداو دیجیتاڵ
لە 24 کاژێری رابردوودا بۆردوومانی سەر چەند ناوچەیەکی تاران بەردەوام بوون، بەگوێرەی ئەو دیمەنانەی بڵاوکراونەتەوە، یەکێک لەو شوێنانەی هێرشی کراوەتە سەر، زانکۆی زانست و پیشەسازیی شارەکەیە.
بەرەبەیانی ئەمڕۆ شەممە 28-03-2026، هاوشێوەی رۆژانی رابردوو هێرشێکی چڕ کرایە سەر چەند ناوچەیەکی تاران، لەوانەش، نۆبۆنیاد، ئەقدەسییە، شەقامی دەوڵەت، شەهرەکی غەرب، ئێکباتان، رۆژهەڵاتی شارەکە و چەند ناوچەیەکی دیکە.
بەگوێرەی زانیارییەکان، زانکۆی زانست و پیشەسازیی تاران، لەنێو ئەو شوێنانەدایە کە بۆردوومان کراوە.
لە دیمەنەکاندا دیارە کە دووکەڵ و ئاگرێکی چڕ لە بەشێکی زانکۆکەکە بەرز دەبێتەوە.
هاوکات لە نزیک فڕۆکەخانەی مێهرئاباد دەنگی چەند تەقینەوەیەکی بەهێز بیستراوە و سیستمی بەرگریی ئاسمانیی ناوچەکەش کاراکراوە.
میدیای ئێرانیش چەندین دیمەنی لە بۆردوومانەکان بڵاوکردووەتەوە و بیستنی دەنگی تەقینەوەی بەهێزی لە چەند ناوچەیەکی تاران پشتڕاست کردووەتەوە، بەڵام تاوەکو ئێستا قەبارەی زیانەکانی هێرشەکە نازانرێت.
