رووداو دیجیتاڵ
کۆمەڵەی مانگی سووری ئێران لە نوێترین راپۆرتیدا قەبارەی ئەو زیانە مادییانەی ئاشکرا کرد کە بەهۆی هێرشە ئاسمانییەکانی ئەمریکا و ئیسرائیل بەر ناوچە نیشتەجێبووەکانی ئەو وڵاتە کەوتوون. بەپێی ئامارەکان، زیاتر لە 93 هەزار یەکەی نیشتەجێبوون و بازرگانی زیانیان بەرکەوتووە.
مانگی سووری ئێران رایدەگەیێنێت، لە ئەنجامی بۆردوومانە چڕەکاندا 93 هەزار و 233 یەکەی سڤیل زیانیان بەرکەوتووە کە دابەشبوون بەسەر 71 هەزار و 547 یەکەی نیشتەجێبوون و 20 هەزار و 779یەکەی بازرگانی. تەنیا لە تاران، پایتەختی وڵاتەکە، 31 هەزار و 562 یەکەی نیشتەجێبوون و بازرگانی زیانیان بەرکەوتووە یان بەتەواوی وێران بوون.
راگەیێنراوەکە ئاماژە بەوەش دەکات، هێرشەکان تەنیا ناوچە سەربازییەکانیان نەگرتووەتەوە، بەڵکو ژێرخانی خزمەتگوزارییەکانیش کراونەتە ئامانج، بەم جۆرە:
تەندروستی: 295 ناوەندی تەندروستی و نەخۆشخانە زیانیان بەرکەوتووە.
پەروەردە: 600 قوتابخانە لە ناوچە جیاجیاکان وێران بوون یان زیانیان پێگەیشتووە.
تیمەکانی فریاگوزاری: 17 ناوەندی مانگی سوور، 48 ئۆتۆمبێلی ئۆپەراسیۆن، 46 ئەمبووڵانس و 3 هێلیکۆپتەری فریاگوزاری کراونەتە ئامانج و لەکارکەوتوون.
ئەم ئامارانەی مانگی سوور لە کاتێکدان کە لە شەڕی هاوپەیمانیی ئەمریکا-ئیسرائیل دژی ئێراندا بەپێی دواین ئاماری وەزارەتی تەندروستیی ئێران، ژمارەی کوژراوانی مەدەنی و سەربازی 1,937 کەسی تێپەڕاندووە و بریندارانیش گەیشتوونەتە زیاتر لە 24,800 کەس.
هاوکات لەگەڵ وێرانکارییە مەدەنییەکان، سوپای پاسدارانی ئێران بانگەشەی ئەوە دەکات کە لە هێرشێکی موشەکیدا بۆ سەر دوو حەشارگە لە دوبەی، زەرەر و زیانی گەورەی بە زیاتر لە 500 سەربازی ئەمریکی گەیاندووە.
کەرتی پۆڵا و وزەی ئێرانیش زیانی گەورەیان بەرکەوتووە، بە جۆرێک رۆژی هەینی 2026/03/27 کۆمپانیای پۆڵای خوزستان راگرتنی تەواوەتی هێڵەکانی بەرهەمهێنانی بەهۆی بۆردوومانەوە راگەیاند.
