رووداو دیجیتاڵ
ئەمڕۆ هەینی 30ی تشرینی یەکەمی 2026، سێیەم رۆژی دوانزەیەمین فێستیڤاڵی هەناری هەڵەبجە بەڕێوەچوو، کە تێیدا هەزاران هاونیشتمانی و گەشتیار بەشدارییان کرد و بڕیارە سبەی کۆتایی بە فێستیڤاڵەکە بێت.
فێستیڤاڵەکە، کە رۆژی چوارشەممە 28-10-2026 دەستیپێکرد، چەندین چالاکیی بازرگانی، فەرهەنگی و هونەری لەخۆگرتبوو. لە ماوەی سێ رۆژی رابردوودا، بەشداربووان بەردەوام لە زیادبووندا بوون و خواستێکی زۆر لەسەر کڕینی هەنار و بەرهەمە خۆماڵییەکان هەبووە.
لە فێستیڤاڵەکەدا 512 کەپر دانراون، کە 159یان بۆ فرۆشتنی هەناری ساڵەخانی و جۆرەکانی دیکەی هەناری هەڵەبجە تەرخانکراون. هاوکات، بەشەکانی دیکەی وەک خواردنی کوردەواری، کاری دەستیی خانمان و بەرهەمە خۆماڵییەکان، سەرنجی سەردانیکارانیان راکێشاوە.
بە گوتەی سەرپەرشتیاران، فێستیڤاڵەکەی ئەم ساڵ فراوانتر بووە و پلانەکان بە سەرکەوتوویی جێبەجێ کراون.
ساڵانە لە پارێزگای هەڵەبجە نزیکەی 40 هەزار تۆن هەنار بەرهەم دەهێندرێت. ئەم فێستیڤاڵە ساڵانە دەرفەتی کار بۆ هەزاران کەس دروست دەکات و ئابووریی ناوچەکە بۆ ماوەی چوار رۆژ زیاتر دەبووژێنێتەوە.