رووداو - بی بی سی
فڕۆكەكانی بەریتانیا پێدەچێت تا چەند رۆژێكی دیكە شەڕ دژی گروپی دەوڵەتی ئیسلامی ناسراو بە داعش لە سووریا دەستپێبكەن.
سەرۆكوەزیرانی بەریتانیا دەیڤید كامیرۆن دەڵێت، كە بەریتانیا ناتوانێت لە دەرەوەی ئەم شەڕە بووەستێت و تەنیا سەیر بكات، بەڵام بەپێی یاسای ئەو وڵاتە بۆ بڕیاری شەڕكردن، حكومەت پێویستی بە مۆڵەتی پەرلەمانە. لەبەر ئەوەی چاوەڕواندەكرێت دەیڤید كامیرۆن داوا لە پەرلەمان بكات بۆ ئەوەی رۆژی هەینی كۆببێتەوە و مۆڵەتی بەشداریی لەو شەڕە دژی داعش بدات.
ئەگەر بێت و حكومەتی بەریتانیا ئەو مۆڵەتە وەربگرێت، ئەوا ئەو فڕۆكە جەنگیانەی بەریتانیا بە ناوی (تۆرنادۆ) كە ئێستا لە رۆژهەڵاتی ناوەڕاستن، دەتوانن لە شەممەوە بەشداریی لەو شەڕەدا بكەن.
بەریتانیا لە شەڕی دژی داعش لە عێراق بەشداریكردووە و ئێستا خەریكە چەك رەوانەی كوردستان دەكات و راوێژكارە سەربازییەكانی ئەو وڵاتە لە باشووری كوردستان خەریكی راهێنانن بە هێزی پێشمەرگە.
هاوینی ساڵی رابردوو دەیڤید كامیرۆن شكستی هێنا لە مۆڵەت وەرگرتن لە پەرلەمان، بۆ ئەوەی فڕۆكە بەریتانییەكان سوپای سووریا بۆردوومان بكەن.
دەیڤید كامیرۆن لەسەر گروپی داعش دەڵێت:"نەوتی هەیە، پارەی هەیە، ناوچەی كۆنترۆڵكراوی هەیە و چەكیشی هەیە و هیچ گومانێكم نییە لەوەی كە ئەم گروپە خەریكە پیلان دادەڕێژێت لە دژی ئەوروپا و شوێنەكانی دیكە. لەبەر ئەوە ئێمە ناتوانین لە دەرەوەی ئەم شەڕەوە بین."
